Deputetët e Partisë Socialiste zbritën në terren sot për të zhvilluar nismën që kryeministri Edi Rama e emërtoi “Praninë Besnike”, me synimin për t’u ulur ballë për ballë me qytetarët për të dëgjuar problematikat dhe shqetësimet e tyre. Urdhri nga Rama ishte që deputetët të dilnin jashtë zyrave lokale të PS dhe të takonin popullin pa praninë e kamerave dhe aparateve fotografikë.
Nisma nisi pasditen e sotme në orën 17:00, dhe në takimet e publikuara në zona të ndryshme u vu re edhe prania e drejtorëve të institucioneve dhe militantëve të Partisë Socialiste. Megjithatë, urdhrit duket se nuk i janë bindur të gjithë deputetët: Erion Braçe njoftoi se do të nisë dëgjesat javën e ardhshme, pasi të ketë përfunduar konsultimin me grup-seksionet e PS të njësisë pesë. Po ashtu, ish-kryetarja e Kuvendit dhe ish-ministrja e Punëve të Jashtme, Elisa Spiropali, ende nuk ka publikuar vendtakimin si deputete e Tiranës, dhe Fatmir Xhafaj gjithashtu nuk ka bërë të ditur se ku do të aplikojë “Praninë Besnike”.
Të tjerët kanë publikuar vendtakimet e tyre përmes rrjeteve sociale. Ish-ministrja e Bujqësisë, Anila Denaj, ka njoftuar se do të takohet me qytetarët në një kafene në Bërzhitë. Ish-ministri i Brendshëm Ervin Hoxha ka zgjedhur një lokal në rrugën “Migjeni”, Njësia 11, Tiranë. Ogerta Manastirliu, e propozuar për garën e ardhshme të zgjedhjeve lokale për Tiranën, do të zhvillojë takimin në Bibliotekën “Petro Zheji”, Njësia 9, Tiranë.
Numri dy i qeverisë, Albana Koçiu, ka përcaktuar Sheshin Garibaldi në Kombinat si vendtakim, ndërsa Blendi Gonxhe, ministër i Kulturës, ka zgjedhur një bar-kafe për t’u takuar me qytetarët e Mëzezit. Për qytetarët e Kavajës është bërë e ditur që kryetari i grupit parlamentar të PS, Taulant Balla, do të jetë i disponueshëm për t’i dëgjuar.
Në ditën e parë të nismës u panë takime të ndryshme në terren, me disa deputetë aktivë në përzgjedhjen e ambienteve publike si kafene, biblioteka dhe sheshe, ndërsa të tjerë ende nuk kanë publikuar vendtakimet e tyre.
