“Prania Besnike”, nisma e re e Partisë Socialiste për takimet e deputetëve me qytetarët, nisi të premten në orën 17:00 në të gjithë vendin, megjithatë jo të gjithë deputetët socialistë zhvilluan takime. Në ditën e parë u vu re edhe prania e drejtorëve të institucioneve dhe militantëve të Partisë Socialiste në disa nga ngjarjet e publikuara.
Kryeministri Edi Rama njoftoi se iniciativa do të zhvillohet çdo të premte, në të njëjtën orë dhe vend. Ai e përshkroi “Praninë Besnike” si një hapësirë neutrale ku qytetarët mund të paraqesin personalisht shqetësimet, ankesat ose kërkesat e tyre pa kamera dhe pa simbole partiake. Rama theksoi se nuk bëhet fjalë për një mbledhje kolektive, por për dëgjesa individuale, ku shqetësimet mbahen shënim dhe adresohen zyrtarisht tek institucionet përmes deputetit. Sipas tij, nisma nuk premton zgjidhjen e çdo problemi, por synon që asnjë kërkesë të mos mbetet pa u adresuar dhe që qytetarët të marrin përgjigjen që u takon.
Pas urdhrit për nisjen e nismës, disa deputetë publikuan vendtakimet e tyre: ish-ministrja e Bujqësisë Anila Denaj njoftoi një takim në një kafene në Bërzhitë; ish-ministri i Punëve të Brendshme Ervin Hoxha zgjodhi një lokal në rrugën “Migjeni”, Njësia 11, Tiranë; numri dy i qeverisë Albana Koçiu vendosi t’i zhvillojë takimet në Sheshin Garibaldi, Kombinat; ministri i Kulturës Blendi Gonxhe zgjodhi një bar-kafe për qytetarët e Mëzezit. Ogerta Manastirliu për zgjedhjet lokale të Tiranës zgjodhi Bibliotekën “Petro Zheji”, Njësia 9, Tiranë. Erion Braçe do të nisë dëgjesat javën e ardhshme pas konsultimeve me grup-seksionet e PS të njësisë pesë.
Disa figura nuk kanë publikuar ende vendtakimet: ish-kryetarja e Kuvendit dhe ish-ministria e Punëve të Jashtme Elisa Spiropali dhe Fatmir Xhafaj. Qytetarët e Kavajës do të dëgjohen nga kryetari i grupit të PS, Taulant Balla, ndërsa deputetët e qarqeve të tjera publikuan vendtakime në kafene dhe qendra fshatrash për të çuar përpara “Praninë Besnike”. Burimi: Top Channel.
