Ndarja tragjike nga jeta e Fatjon Bunjakut, sulmuesit 22-vjeçar, ka tronditur familjen, miqtë dhe komunitetin sportiv. Pas lajmit, AF Elbasani reagoi në rrjetet sociale me një mesazh ngushëllimi, duke shprehur dhimbjen për humbjen e futbollistit. Klubi e përshkroi Bunjakun si një lojtar të rëndësishëm të skuadrës dhe si një njeri që përfaqësoi me dinjitet dhe krenari ngjyrat e Elbasanit. Në reagimin zyrtar thuhet: “Me dhimbje të thellë morëm lajmin për ndarjen nga jeta të lojtarit tonë, Fatjon Bunjaku. Sot, familja e madhe e klubit tonë humbi jo vetëm një lojtar, por një njeri që mbajti me krenari ngjyrat e klubit dhe la kontributin e tij në historinë tonë.”
Klubi vlerësoi përkushtimin dhe pasionin e Bunjakut për lojën dhe theksoi se ai do të mbetet gjithmonë pjesë e identitetit të Elbasanit. Në mesazhin e ngushëllimit, verdheblutë shprehën mbështetjen për familjen Bunjaku dhe për të gjithë ata që e njohën nga afër sulmuesin e talentuar. Sërish në reagim thuhet: “Në këto momente të vështira, mendimet dhe lutjet tona janë me familjen Bunjaku, miqtë dhe të gjithë ata që patën fatin ta njohin dhe ta duan Fatjonin. Fatjoni nuk do të harrohet.”
Lajmi vjen si një goditje për komunitetin sportiv dhe për skuadrën e AF Elbasanit, ku Bunjaku konsiderohej si pjesë e rëndësishme e projektit e historisë klubit. Reagimi i klubit përmbledh dhimbjen, mirënjohjen për kontributin e tij në fushë dhe solidaritetin me të afërmit e të ndjerit, duke theksuar se emri dhe vepra e tij do të mbeten në kujtesën e klubit dhe tifozëve.
