FIFA po shqyrton zyrtarisht mundësinë e zgjerimit të Kupës së Botës në 64 skuadra për edicionin e 2030, njoftoi presidenti Gianni Infantino, duke shtuar se hipoteza do të diskutohet në komisionet përkatëse pas përfundimit të turneut aktual. Ky propozim vjen vetëm pak vite pas zgjerimit në 48 skuadra për edicionin e 2026, të organizuar nga SHBA, Kanadaja dhe Meksika, dhe synon rritjen e numrit të vendeve që marrin pjesë në fazën finale.
Sipas Infantino, iniciativa lind nga dëshira që çdo komb të ketë të drejtën për të ëndërruar pjesëmarrjen në Kupën e Botës dhe nga bindja se përjashtimi i vendeve të vogla u heq atyre stimulin për t’u përmirësuar. Për edicionin e 2030 parashikohet një formulë të re që përfshin tre kontinente dhe gjashtë shtete nikoqire: Marokun, Portugalinë dhe Spanjën si organizatore kryesore, ndërsa Argjentina, Uruguaji dhe Paraguaji do të presin secili nga një ndeshje në kuadër të 100-vjetorit të turneut.
Rritja në 64 skuadra do të ndryshonte dinamikat e organizimit, duke i hapur mundësi vendeve të Amerikës Latine për të pritur ndeshje të fazës së grupeve. Ky aspekt paraqitet si një mënyrë për të kompensuar rregullat e rotacionit të FIFA-s, të cilat sipas njoftimeve do të përjashtojnë vendet amerikanolatine nga mundësia e organizimit të Kupës së Botës deri në vitin 2042.
Megjithatë, ideja për një Botëror me 64 skuadra nuk gëzon konsensus. Një format i tillë do të sillte kualifikimin e më shumë se një të katërtës së 210 federatave anëtare të FIFA-s, çka ngre shqetësime mbi nivelin konkurrues dhe strukturën e turneut. Drejtuesit e futbollit evropian dhe amerikanoverior, me në krye Aleksander Ceferin dhe Victor Montagliane, kanë shprehur kundërshtime ndaj këtij propozimi, duke e përshkruar atë si të dëmshëm.
