Ansambli Kombëtar u ngjit në skenën e Show Theatre në qendër të Londrës në një mbrëmje që ndërthurte trashëgiminë kulturore shqiptare me vizionin dhe frymëzimin që Lord Bajroni gjeti në Shqipëri. Për herë të parë në historinë 70-vjeçare të tij, Ansambli performoi si një trupë e vetme artistike në një skenë prestigjioze të Londrës, një moment që Sokol Marsi e përshkroi si krenari jo vetëm për Ansamblin, por për të gjithë kulturën shqiptare.
Produksioni etno-muzikor dhe teatror “Shqipëria përmes syve të Bajronit” ndërthur historinë, poezinë, muzikën dhe trashëgiminë kulturore shqiptare në një rrëfim artistik me identitet kombëtar. Aktiviteti, që pati jehonë në komunitetin shqiptar dhe atë britanik, u organizua nga organizata Empowered Women of Diaspora. Ensuita Këputa theksoi se misioni i organizatës shkon përtej fuqizimit të grave, duke synuar krijimin e urave lidhëse mes komuniteteve, institucioneve dhe vendeve përmes kulturës, arsimit dhe diplomacisë kulturore.
Në mbrëmje morën pjesë përfaqësues të komunitetit dhe institucioneve vendore; kryebashkiaku i Borough-it të Camden në Londër, Eddie Hanson, e vlerësoi aktivitetin si një festë të diversitetit dhe gjithëpërfshirjes, duke nënvizuar se komuniteti shqiptar në Mbretërinë e Bashkuar është i përfaqësuar dhe shihet pozitivisht. Një dimension të veçantë artistik i dha interpretimi i autorit dhe aktorit britaniko-kosovar Robert Wilton në rolin e Lord Bajronit, si dhe interpretimi i kryebashkiakut të Borough-it të Camden, Eddie Hanson.
Teatri u mbush me një publik të përzier, jo vetëm shqiptarë, por edhe të huaj, të cilët ndoqën me vëmendje shfaqjen. Një qytetare tha se kishte vizituar Shqipërinë dhe ishte tërhequr nga muzika, prandaj vendosën të vinin në shfaqje dhe kaluan shumë bukur. Përmes kësaj shfaqjeje, “Shqipëria përmes syve të Bajronit” shënoi një tjetër hap në promovimin ndërkombëtar të kulturës dhe trashëgimisë shqiptare. Top Channel.
