Një vjedhje e bujshme goditi muzeun e Qendrës së Artit Bashkëkohor në Issoire, Auvergne, ku persona të paidentifikuar vodhën veprën monumentale “L’Apocalypse”. Dyqind e dhjetë kilogramë peshojë dhe e zbukuruar me ar dhe gurë të çmuar, vepra është e vlerësuar në disa milionë euro. Dikur cilësohej si “libri më i çmuar në botë”; vetëm kopertina prej bronzi, e realizuar nga Salvador Dalí, peshon 150 kilogramë. Vepra u konceptua dhe porosit në vitin 1959 nga botuesi Joseph Forêt, bazuar në “Apokalipsin” e Shën Gjonit.
Në realizimin e “L’Apocalypse” morën pjesë shtatë artistë të njohur, ndër të cilët Salvador Dalí, Georges Mathieu, Bernard Buffet dhe Leonor Fini. Shtatë shkrimtarë dhe mendimtarë, përfshirë Jean Cocteau, Emil Cioran dhe Ernst Jünger, kontribuan me komente dhe reflektime në botimin e veprës. Që prej vitit 1961 vepra është ekspozuar në vende të ndryshme të botës.
Pas disa pronarëve, në vitin 2002 e bleu koleksionisti Christian Karoutzos. Ai ka rrëfyer se i deshën dhjetë vjet për ta paguar, duke punuar shtatë ditë në javë. Vlera e veprës është përcaktuar në disa milionë euro. Pas 24 vjetësh në pronësi të tij, këtë verë Karoutzos vendosi ta ekspozonte në Qendrën e tij të Artit Bashkëkohor — dhe vetëm pak muaj më vonë vepra u vodh.
Autoritetet franceze kanë hapur një hetim për ngjarjen. Pronari është shprehur për humbjen duke theksuar rëndësinë e veprës: “Është një vepër unike në botë. Kanë vrarë trashëgiminë franceze, kanë vrarë Francën”, deklaroi ai. Për momentin zyrat hetimore dhe muzeu nuk kanë dhënë detaje të tjera rreth mënyrës së vjedhjes apo autorëve të dyshuar, ndërsa vlera materiale dhe historike e punimit e bën rastin të ndjekur me seriozitet.
