Pas dy vitesh me trofe dhe pjesëmarrje në Europë, Dinamo synon të ndërtojë një model të qëndrueshëm dhe presidenti Ardian Bardhi i atribuoi një pjesë të rëndësishme të këtij projekti trajnerit Ilir Daja. Në intervistën ekskluzive për Top Channel, Bardhi thekson se roli i Dajës shtrihet përtej fushës së lojës, duke përfshirë ndërtimin e skuadrës dhe suksesin në merkato. “Puna e Dajës reflektohet edhe në shitjen e lojtarëve që Dinamo sot ka shitur në klube shumë të rëndësishme,” thotë presidenti, dhe vlerëson se edhe transferimi i fundit te Genk është rezultat i punës së përbashkët të trajnerit, grupit dhe klubit: “Për mendimin tim është një rezultat i Dajës, i grupit tonë, të gjithë bashkë.”
Bardhi sqaron mënyrën e vendimmarrjes në klub, duke nënvizuar që nuk ndërhyn në formacion apo në vendime teknike: “Jo, jo, ashtu nuk jam fare.” Për merkaton ai e quan Dajën “filtrin” e Dinamos, pasi trajneri hedh në fushë lojtarët dhe vlerëson elementët teknikë dhe taktike: “Filtri patjetër, se ai hedh njerëzit në fushë. Ai shikon gjithçka.” Presidenti përshkruan bashkëpunimin midis tij dhe trajnerit si “një simfoni”, duke theksuar sinkronizimin në vendimmarrje për zhvillimin e klubit.
Objektivi për sezonin e ri është i qartë: ndërtimi i një skuadre që të konkurrojë për titullin dhe fitimi i kampionatit. Bardhi përsërit synimin kryesor: “Dinamo këtë vit, plani kryesor është fitimi i kampionatit. Objektivi kryesor është fitimi i kampionatit.” Nën drejtimin e Bardhit, klubi ka arritur dy Kupa Republike, një Superkupë dhe ka marrë pjesë dy vite radhazi në kompeticionet europiane, por këtë sezon ambicia është më e madhe. Merkatoja vazhdon të jetë e hapur dhe dera e Dinamos mbetet e hapur për lojtarët që përshtaten me projektin, megjithatë vendimin final e merr trajneri që i sheh në fushë: Profesor Daja.
Shënim: Ky material është ekskluziv i Top Channel. Ndalohet riprodhimi, publikimi apo përdorimi i tij, i plotë ose i pjesshëm, pa autorizim dhe pa përmendur burimin.
