Për herë të parë, Festivali Ndërkombëtar i Filmit zhvillohet njëkohësisht në Gjirokastër dhe Dropull. Ngjarja zgjat katër ditë dhe në ekranin e madh të kinemasë do të shfaqen 30 filma konkurrues, prodhime kinematografike nga Shqipëria, Kosova dhe Greqia. Programi përfshin gjithashtu organizimin e workshopeve për filmin, animacionin, pikturën e aktivitete të tjera të lidhura me artet vizuale, me pjesëmarrjen e artdashësve të moshave të ndryshme.
Organizatorët synojnë të sjellin në një platformë bashkëpunimin rajonal në fushën e kinematografisë dhe të ofrojnë një hapësirë ku komunitetet lokale të kenë akses në kinematë që shfaqin prodhime të regjisorëve nga vende të ndryshme. Në lidhje me vlerën e këtij bashkëpunimi, një pjesëmarrëse tha: “Mendoj se ky është një festival i rëndësishëm për rajonin sepse vendosen ura bashkëpunimi në fushën e kinematografisë midis Shqipërisë, Kosovës dhe Greqisë. Gjithashtu, është një mundësi e mirë për komunitetet lokale që të vijnë në kinema për të ndjekur filma të regjisorëve nga vende të ndryshme. Në këtë mënyrë diskutohet për bashkëpunim kinematografik rajonal, si dhe forcimin e tij në të ardhmen.”
Një tjetër pjesëmarrëse, e cila erdhi si regjisore dhe ka përgatitur një film për konkurrim, shprehu përshtypjen e saj nga qyteti dhe dëshirën për sukses të festivalit: “Ndodhem në këtë festival si regjisore, ndërsa kam përgatitur një film për konkurrim. Është hera e parë që vij në Shqipëri dhe Gjirokastër. Është një vend shumë i këndshëm dhe tërheqës, uroj që festivali të ketë sukses!”
Në këtë sezon vere, Festivali Ndërkombëtar i Filmit ka kthyer Gjirokastrën, qytetin e gurtë, në qendër të prezantimit të vlerave të kinematografisë. Transmetimi i filmave po tërheq një audiencë të përbërë nga artdashës dhe turistë, ndërsa aktivitetet e shoqëruara, si workshopet, synojnë të angazhojnë publikun dhe të nxitur shkëmbimin profesional dhe kulturor midis vendeve pjesëmarrëse.
