Një punonjës i Policisë së Sarandës është vënë nën masën e sigurisë “arrest në shtëpi”, pasi dyshohet për kryerje të ndërtimeve pa leje në një objekt me funksion hotelier. Ngjarja u dokumentua nga Agjencia e Mbikëqyrjes Policore (AMP) në kuadër të procedimit penal 304/2026, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Sarandë. Në njoftim përmendet emri i efektivit si Ajdin Ismailaj/Islamaj, i cili në kohën e veprimeve shërbente si Specialist për Hetimin e Krimeve në Komisariatin e Policisë Sarandë.
Hetimet tregojnë se në pronën e babait të efektivit, ku ky i fundit banon, është shtuar një kat i tërë pa lejen përkatëse të autoriteteve. Akti i ekspertimit teknik i administruar në hetim konstaton se janë kryer punime ndërtimore të tipit shtim kati mbi një objekt ekzistues dykatësh, si dhe ndërhyrje të tjera rikonstruktive për ndryshim destinacioni të objektit në funksion të akomodimit (hotel). Ekspertët e licencuar kanë arritur në përfundimin se struktura e realizuar përbën ndërtim të ri në kuptim të legjislacionit për planifikimin dhe zhvillimin e territorit dhe për këtë kërkohej pajisja me leje ndërtimi nga autoritetet kompetente.
Nga verifikimet e kryera nuk rezulton të jetë miratuar ndonjë leje ndërtimi për realizimin e këtij kati shtesë. Hetimet kanë konstatuar se sipërfaqja e ndërtuar pa leje është së paku 159 metra katrorë me funksion hotel. Analiza e pamjeve satelitore dhe hetimet kanë vërtetuar se punimet janë realizuar gjatë vitit 2025.
AMP thekson nevojën për respekt të ligjit nga punonjësit e policisë dhe paralajmëron se hetimet vijojnë për dokumentimin e plotë të përgjegjësive penale, identifikimin e çdo personi të përfshirë dhe verifikimin e rrethanave që kanë mundësuar realizimin e këtyre ndërtimeve në kundërshtim me legjislacionin në fuqi. Agjencia deklaron gjithashtu angazhimin për të goditur çdo formë paligjshmërie pa dallim detyre apo pozicioni. Burimi: Top Channel.
