Pelegrinazhi i Madh i Malit të Tomorrit, që kulmon në muajin gusht, ka mbledhur bashkë me qindra mijëra qytetarë për ditë me radhë, të cilët mes lutjesh dhe riteve janë drejtuar me besim drejt Teqesë së Kulmakut në malin e shenjtë. Ngjitja drejt malit nisi që në ditët e para të pelegrinazhit; besimtarët me qirinj në duar kryejnë ritet tradicionale dhe marrin pjesë në momentet qendrore të kremtimit. Një prej tyre është flijimi i qengjit, mishi i të cilit piqet dhe ndahet mes pelegrinëve.
Për shumë besimtarë, udhëtimi nuk përfundon në Kulmak: ata vijojnë rrugën drejt majës së Tomorrit, në 2,416 metra lartësi, duke e kthyer ngjitjen edhe në një përjetim shpirtëror. Dita e 22 gushtit shënoi kulmin e festimeve, ndërsa pelegrinazhi vijon deri më 25 gusht.
Para besimtarëve, Kryegjyshi Botëror Bektashian, Haxhi Dede Baba Mondi, theksoi bashkimin që sjell kjo festë, pavarësisht origjinës apo vendit nga vijnë pelegrinët. Ai u shpreh: “Të dashur besimtarë, një nga bukuritë më të mëdha të këtij pelegrinazhi është se këtu takohen njerëz të ndryshëm, janë qytete e krahina të ndryshme, janë troje shqiptare dhe nga vende të ndryshme të botës. Këtu na bashkon një gjë shumë më e madhe se dallimet tona, besimi në paqe, dashuria për njeriun dhe respekti për atë që është e shenjtë.” Mesazhi i tij përfshinte edhe një apel për më shumë mirëkuptim dhe bashkim mes shqiptarëve.
Gjatë ditëve të pelegrinazhit janë angazhuar forcat e Policisë dhe strukturat vendore, të cilat po menaxhojnë qarkullimin dhe sigurinë përgjatë rrugës drejt malit të shenjtë. Organizimi përfshin koordinimin e rrugëve dhe prania e strukturave të sigurisë për të lehtësuar lëvizjen e besimtarëve dhe për të toleruar fluksin e madh që ka shoqëruar manifestimin fetar.
