Bashkia Mirditë u përfshi në nisjen e fazës së dytë të programit “BE për Bashkitë” (EU4Municipalities), një iniciativë me vlerë 11 milionë euro që synon forcimin e qeverisjes vendore dhe përmirësimin e shërbimeve publike. Programi fokusohet në zhvillimin ekonomik lokal dhe në përafrimin e bashkive me standardet evropiane, ndërsa pjesë e paketës do të jenë edhe grante direkte për bashkitë.
Në kuadër të Javës së Evropës 2026, në Bashkinë Mirditë u zhvillua aktiviteti rajonal për prezantimin e fazës së re të programit. Në këtë takim morën pjesë përfaqësues të Delegacionit të Bashkimit Evropian në Shqipëri, përfaqësues të institucioneve qendrore dhe vendore, partnerë ndërkombëtarë, organizata të shoqërisë civile dhe qytetarë, të cilët diskutuan rreth objektivave dhe mundësive që ofron programi për zhvillimin lokal.
Kryetari i Bashkisë Mirditë, Albert Melyshi, vlerësoi Javën e Evropës si një moment reflektimi mbi rrugëtimin evropian të Shqipërisë dhe mbi partneritetin me Bashkimin Evropian. Ai theksoi se mbështetja e BE-së ka sjellë përmirësime konkrete në infrastrukturë dhe në shërbimet publike, si dhe në përafrimin e standardeve vendore me ato evropiane.
Drejtorja e Bashkëpunimit në Delegacionin e BE-së në Shqipëri, Ritva Heikkinen, prezantoi detaje të fazës së re të programit, duke sqaruar se nga totali prej 11 milionë eurosh, 6.5 milionë euro do të shpërndahen në formë grantesh për bashkitë shqiptare. Ajo nënvizoi se qëllimet kryesore janë rritja e cilësisë së shërbimeve publike, forcimi i transparencës dhe nxitja e zhvillimit ekonomik lokal.
Gjatë aktivitetit u identifikuan sfidat kryesore të Mirditës, përfshirë emigracionin, zhvillimin ekonomik, gjendjen e infrastrukturës dhe mungesën e mundësive për të rinjtë. U theksua nevoja për bashkëpunim të ngushtë mes pushtetit vendor, institucioneve qendrore dhe partnerëve ndërkombëtarë për adresimin e këtyre çështjeve.
Në përmbyllje u vlerësua kontributi shumëvjeçar i partnerëve ndërkombëtarë në zhvillimin e zonës, duke përfshirë Austrinë, Japoninë, Italinë, UNDP-në dhe organizata të tjera, si dhe angazhimin e tyre në projekte sociale dhe zhvillimore në Mirditë.
