Zjarret masive pyjore në jugperëndim të Francës dhe në Spanjën qendrore kanë detyruar evakuimin e më shumë se 220 mijë personave, ndërsa autoritetet po përballen me përhapjen e shpejtë të flakëve të favorizuara nga temperaturat e larta dhe erërat e forta. Ushtria franceze është angazhuar në operacionet e emergjencës, ndërsa qeveria spanjolle ka shpallur gjendjen e emergjencës kombëtare.
Megjithëse fluturimet drejt Bordeaux dhe Madridit vijojnë normalisht, autoritetet i kanë bërë thirrje turistëve të ndjekin udhëzimet e emergjencës. Ministrja franceze për partneritete ndërkombëtare, Éléonore Caroit, deklaroi se shumica e rajoneve të Francës mbeten të sigurta dhe u kërkoi vizitorëve të mos anulojnë udhëtimet, por të informohen vazhdimisht për situatën.
Dhjetëra turistë rrëfyen për BBC momentet dramatike të evakuimit: alarma që i zgjuan në mes të natës, kolonat e makinave pranë flakëve gjigante dhe qindra persona që prisnin në plazhe ose në qendra strehimi me valixhet në duar. 21-vjeçari Zac Morrison nga Londra, i evakuuar nga gadishulli Cap Ferret me familjen, tha se mori mesazhe emergjence gjatë natës që urdhëronin evakuimin e menjëhershëm dhe përshkroi ushtrinë që shkonte derë më derë. Sipas tij, familja u largua nga një zonë e rrezikuar vetëm për t’u përballur me një tjetër vatër zjarri; shumë të evakuuar kaluan natën në plazhe, shkolla dhe depo të improvizuara si strehimore.
David Morton nga Gloucestershire tregoi se brenda pak minutash familja e tij u detyrua të largohej nga kampingu në Cap Ferret, ndërsa rrugës iu afruan flakëve. Në komunën Biscarrosse, Rebecca Papin pa aeroplanë zjarrfikës dhe helikopterë që luftonin flakët gjatë natës, ndërsa të nesërmen zbuloi se qyteti ishte pothuajse i zbrazët dhe rrugët të bllokuara nga zjarri me hiri që binte si borë.
Shumë familje ndryshuan destinacionet e pushimeve. Mark Dorey nga Leeds u evakuua nga një kamping pranë Parentis-en-Born dhe kaloi natën në një palestër me qindra persona të tjerë, përpara se të zhvendosej në rajonin Dordogne për të vazhduar pushimet në një zonë më të sigurt. Top Channel.
