Franca dhe Spanja po përballen me valë të rënda zjarresh, ndërsa mbi 80 mijë persona janë evakuuar nga zonat e rrezikuara. Në Francë autoritetet urdhëruan evakuimin e plotë të gadishullit turistik Cap Ferret; ministri i Brendshëm Laurent Nuñez bëri të ditur se rreth 40 mijë persona u larguan nga aty, me qindra banorë dhe turistë që u nxorrën me varka dhe të tjerë me automjete. Në rajonin Gironde zjarret që nisën të martën kanë djegur mbi 10 mijë hektarë sipërfaqe dhe janë shënuar djegie të shpejta, deri në 1 mijë hektarë në orë në disa zona.
Sipas autoriteteve lokale, deri tani janë shkatërruar 53 banesa dhe një kamp pushimi, ndërsa rreth 2 mijë shtëpi janë shpëtuar falë ndërhyrjes së zjarrfikësve. Një vatër e madhe tjetër është regjistruar në rajonin Landes, pranë Biscarrosse, ku janë evakuuar mbi 23 mijë persona nga banesat, kampingjet, një azil dhe një kamp veror. Deri më tani janë identifikuar 105 ndërtesa të shkatërruara ose të dëmtuara rëndë.
Në Spanjë qeveria shpalli gjendjen e emergjencës kombëtare për përhapjen e pakontrolluar të flakëve pranë Madridit. Zjarret në Villa del Prado dhe San Martín de Valdeiglesias janë bashkuar, dhe më shumë se 19 mijë banorë u detyruan të largohen nga shtëpitë në tre qytete në perëndim të kryeqytetit. Kryeministri Pedro Sánchez e përshkroi situatën si “dramatike”, ndërsa presidentja e rajonit të Madridit, Isabel Díaz Ayuso, deklaroi se bëhet fjalë për “zjarrin më të rëndë në historinë e rajonit”.
Të martën dy zjarrfikës humbën jetën gjatë përpjekjeve për të shuar një vatër pranë aeroportit të Bordeaux. Bashkimi Evropian ka dërguar ndihmë: tre avionë dhe dy helikopterë për Francën, si dhe katër avionë zjarrfikës për Spanjën. Ekspertët paralajmërojnë se temperaturat ekstreme, thatësira e zgjatur dhe erërat e forta krijojnë kushte ideale për përhapjen e shpejtë të zjarreve. Sipas Shërbimit Evropian për Ndryshimet Klimatike “Copernicus”, Evropa po ngrohet më shpejt se çdo kontinent tjetër, duke rritur rrezikun e zjarreve masive gjatë sezonit veror.
