Në një rast të pazakontë zgjedhor në Itali, tri fletë votimi që mbanin emrin e qenit të kandidatit Mario Mantovan, u konsideruan të vlefshme për kryetarin e bashkisë të Porto Viros. Gjykata Administrative e Veneto-s ka rrëzuar ankesën e Stefano Permunian, kandidati i dytë në zgjedhjet lokale, duke konfirmuar kështu fitoren e Mantovan.
Debati u fokusua në fletët e votimit ku ishte shkruar emri “Thor”, emri i qenit të Mantovan. Këto fletë votimi kontribuan me shtatë vota për fitoren e tij në zgjedhjet e mbajtura në maj. Sipas gjykatës, shkrimi i emrit të qenit nuk paraqet një tentativë për të identifikuar votuesin, por përkundrazi, shpreh mbështetje për kandidatin.
Gjykata theksoi se “Thor” kishte qenë një pjesëmarrës aktiv në fushatën e Mantovan, duke marrë pjesë në ngjarje publike dhe duke u shfaqur në rrjetet sociale me të. Prandaj, emri i qenit nuk e komprometon vlefshmërinë e votës, por përforcon qëllimin e votuesit që të zgjedhë atë kandidat.
Ndërkohë, gjykata nuk shqyrtoi aspektin e pranisë së Mantovan në afërsi të qendrave të votimit ditën e zgjedhjeve, një shkelje e ligjit që kërkon që kandidatët të qëndrojnë të paktën 200 metra larg. Sidoqoftë, kjo u konsiderua si një çështje penale jashtë juridiksionit administrativ.
Kështu, nuk do të ketë as anulim të votave dhe as përsëritje zgjedhjesh. Fletët ku ishte shkruar “Thor” ose “Mario Vigile”, referencë për pozitat e mëparshme të Mantovan si drejtues i policisë bashkiake, janë të vlefshme dhe do të merren parasysh në rezultatet përfundimtare të zgjedhjeve.
