Presidenti i Ukrainës, Volodymyr Zelensky, ka kritikuar ashpër dy të dërguarit amerikanë, Steve Witkoff dhe Jared Kushner, për vizitat e tyre në Moskë pa zhvilluar një vizitë zyrtare në Kiev, duke e cilësuar këtë si “mungesë respekti” ndaj Ukrainës në kohë lufte. Ai u shpreh se, edhe pse kupton kompleksitetin logjistik të udhëtimeve, mungesa e një vizite zyrtare në kryeqytetin ukrainas nuk mund të justifikohet dhe se takimet mund të mbaheshin edhe në vende të tjera nëse kjo do të nevojitej.
Të dërguarit amerikanë kanë zhvilluar disa vizita në Moskë, ku Vladimir Putin është takuar shpesh me Witkoff, por asnjëri prej tyre nuk ka pasur një udhëtim zyrtar në Ukrainë, pavarësisht përfshirjes së tyre në përpjekje për negociata armëpushimi. Kjo mungesë kontakti të paktën në formë zyrtare me autoritetet ukrainase ka nxitur reagimin e Presidentit Zelensky, i cili e vlerëson si mosrespekt në kontekstin e konfliktit.
Një vizitë e mundshme e tyre në Kiev ishte planifikuar më herët gjatë muajit prill, por ajo u anulua për shkak të përshkallëzimit të tensioneve në Lindjen e Mesme. Konflikti midis Shteteve të Bashkuara, Izraelit dhe Iranit, sipas njoftimeve, ka zhvendosur fokusin diplomatik amerikan dhe ka qenë arsyeja kryesore për pezullimin e udhëtimit. Për shkak të kësaj, planet për takim të drejtpërdrejtë me zyrtarët ukrainas nuk u realizuan.
Megjithatë, Zelensky thekson nevojën për të vazhduar bashkëpunimin me Shtetet e Bashkuara dhe pranon se Uashingtoni aktualisht i kushton vëmendje zhvillimeve në rajone të tjera. Deklarimet e tij reflektojnë pakënaqësinë për prioritetet e vizitave diplomatike, edhe pse ai shpreh edhe kuptimin për ndikimin e krizave të jashtme në vendimmarrjet e politikës së jashtme amerikane.
