Al Nassr po vlerëson seriozisht mundësinë e promovimit të Cristiano Ronaldo Junior në skuadrën e parë për sezonin e ardhshëm, duke i hapur kështu rrugë një skenari që parashikon 15-vjeçarin (qershor do të mbushë 16 vjeç) të luajë së bashku me të atin, Cristiano Ronaldo, në elitën e futbollit arab. Lajmi është publikuar nga portali alëeeam.com, sipas të cilit drejtuesit e klubit nga Riad synojnë që të marrin një vendim përfundimtar në mbyllje të kampionatit, pasi të kenë kryer një vlerësim teknik të aftësive të të riut dhe të kapacitetit të tij për të kontribuuar në projektin sportiv të verdhebluve.
Klubi do të bëjë këtë vlerësim teknik për të përcaktuar nëse Ronaldo Junior mund të përfshihet në skemat dhe objektivat sportive të ekipit. Me CR7 ende nën kontratë me Al Nassr për një vit tjetër dhe me ambicjen e tij të qartë për të synuar fitimin e titullit, promovimi i të birit në futbollin profesionist do të ishte, sipas raportimit, një operacion me përmasa të pazakonta marketingu dhe aspekti teknik, të cilin raporti e përshkruan si të paprecedentë në historinë e futbollit global.
Në fokus të vendimit të mundshëm janë si çështjet teknike ashtu edhe ato strategjike të klubit: drejtuesit duhet të vlerësojnë nëse integrimi i një lojtari të ri, nga një familje me profil të lartë, i përshtatet objektivave të përkohshme sportivë dhe përpjekjeve për të maksimizuar rendimentin teknik të skuadrës. Raporti thekson gjithashtu se klubi synon të plotësojë dëshirën e legjendës portugeze që të kalojë “stafetën” në fushë te i biri përpara se të tërhiqet përfundimisht, çka e bën çështjen edhe më të ndërlikuar në aspektin e planifikimit sportiv dhe komunikimit publik.
Vendimi final pritet në fund të kampionatit, pas përfundimit të vlerësimeve teknike që do të kryejnë drejtuesit e Al Nassr. Top Channel.
