Një grup dokumentesh arkivore të rilidhura kohët e fundit ngre dyshime se Adolf Hitler mund të ketë qenë i përfshirë në vdekjen e mbesës së tij, Angela “Geli” Raubal, e cila u gjet e vdekur në apartamentin e tij në Mynih në 1931 dhe zyrtarisht u regjistrua si vetëvrasje. Raubal, 23 vjeçe, u gjet me një plagë nga armë zjarri në gjoks; arma ishte një pistoletë që i përkiste Hitlerin. Dokumentet zyrtare të kohës tregojnë se Hitler, që po fitonte famë por ende pa marr pushtetin, ishte larguar nga Mynihu për në Nuremberg një ditë para vdekjes së saj, një kronologji që do ta përjashtonte përfshirjen e tij.
Historiani gjerman Harold Sandner thotë se ka gjetur një hollësi në regjistrin zyrtar të vdekjeve të Mynihut që tregon datën dhe orën e zbulimit të trupit të Raubal: ora 10:15 e mëngjesit më 18 shtator 1931. Dy njoftime vdekjeje të tjera të gjetura në arkiva mbajnë të njëjtën datë. Nëse këto të dhëna janë autentike, ato e shtyjnë momentin e vdekjes rreth 24 orë më herët se si ishte pranuar më parë, çka do të tregonte se Hitler ishte në Mynih kur u zbulua trupi, ndërsa dokumentet zyrtare tregojnë se ai u nis për në Nuremberg pasditen e 18 shtatorit.
Sipas Sandnerit, këto të dhëna kontradiktore mund të sinjalizojnë një mbulim të mundshëm nga zyrtarë policorë dhe mbështetës të Partisë Naziste. Gjetjet u botuan për herë të parë nga revista gjermane Der Spiegel dhe do të detajohen në librin e tij të ardhshëm, “Vdekja e Angela ‘Geli’ Raubal: Vetëvrasje apo lojë e ndyrë?”, që pritet të dalë muajin e ardhshëm. Thomas Weber, një ekspert mbi Gjermaninë naziste që e njeh Sandnerin, tha se historiani është “jashtëzakonisht i përpiktë” dhe se dokumentet e tij janë të besueshme.
Shumë historianë besojnë se Hitler ishte i dashuruar me Raubal dhe se sjellja e tij ndaj saj ishte kontrolluese dhe posesive; para vdekjes ata besohet të kenë diskutuar për dëshirën e saj për t’u larguar nga Mynihu për në Vjenë për studime muzikore. Të dhënat e reja nuk zgjidhin misterin e shkakut të vdekjes, por riaktivizojnë pyetjet rreth asaj që ndodhi brenda shtëpisë së Hitlerit në Mynih ditën e vdekjes së saj.
