Një seri dokumentesh arkivore të zbuluara rishtas ngre dyshime se Adolf Hitleri mund të ketë vrarë mbesën e tij, Angela “Geli” Raubal, e cila u gjet e vdekur në apartamentin e diktatorit në Mynih në 1931, ngjarje që u cilësua zyrtarisht si vetëvrasje. Raubal, 23 vjeçe, u gjet me një plagë arme zjarri në gjoks, ndërsa arma ishte një pistoletë që i përkiste Hitlerit. Dokumentet zyrtare tregojnë se Hitler, i njohur por ende pa marrë pushtetin, ishte larguar nga Mynihu për në Nuremberg një ditë para vdekjes së mbesës, një kohë që do të provonte se ai nuk mund të kishte qenë i përfshirë në ngjarje.
Historiani gjerman Harold Sandner thotë se ka gjetur një detaj në regjistrin zyrtar të vdekjeve të Mynihut që jep datën dhe orën e zbulimit të trupit të Raubal: ora 10:15 e mëngjesit më 18 shtator 1931. Dy njoftime vdekjeje të tjera të gjendura në arkiva mbajnë të njëjtën datë. Nëse këto të dhëna janë autentike, ato do ta vendosnin vdekjen e Raubal rreth 24 orë më herët se ishte pranuar më parë, që do të thotë se Hitleri mund të ketë qenë ende në Mynih kur trupi u zbulua; dokumentet zyrtare tregojnë se ai u nis për në Nuremberg pasi, gjatë pasdites së 18 shtatorit.
Sipas Sandner, këto të dhëna kontradiktore mund të tregojnë për një mbulim të mundshëm të vrasjes nga zyrtarë të policisë që mbështesnin Partinë Naziste. Gjetjet u publikuan për herë të parë nga revista gjermane Der Spiegel dhe do të detajohen në librin e tij të ardhshëm, “Vdekja e Angela ‘Geli’ Raubal: Vetëvrasje apo lojë e ndyrë?”, që pritet të dalë muajin e ardhshëm. Thomas Weber, ekspert për Gjermaninë naziste që e njihte Sandnerin, i tha CNN se historiani është “jashtëzakonisht i përpiktë” dhe se dokumentet e tij janë të besueshme.
Shumë historianë mendojnë se Hitleri ishte i dashuruar me Raubal dhe se sjellja e tij ndaj saj ishte bërë kontrolluese dhe posesive. Pak para vdekjes, ata besohet të kenë debatuar për dëshirën e saj për t’u larguar nga Mynihu për në Vjenë për studime muzikore. Të dhënat e reja nuk zgjidhin misterin e vdekjes, por rihapin pyetjet rreth asaj çka ndodhi brenda shtëpisë së tij në Mynih më 1931. Top Channel.
