Vlora Hyseni, e cila prej më shumë se tre vitesh drejtonte Shërbimin Informativ Shtetëror (SHISH), u vënë nën masë sigurie nga Gjykata e Posaçme, e dyshuar për dy vepra penale: përkrahje të autorit të krimit dhe zbulim të akteve ose të dhënave sekrete. Hetimi bazohet në një procedim të nisur më parë, ndërsa masat ndaj Hysenit u bënë publike kur ajo ishte në një vizitë zyrtare në Baku.
Ekspertët e sigurisë, përfshirë Xhavit Shalën, vlerësojnë se autoritetet hetimore duhej të kishin gjetur një mënyrë tjetër institucionale për të kombinuar hetimin me mbrojtjen e reputacionit të shërbimit. Sipas tij, një alternativë do të ishte kërkimi i dorëheqjes, ndërsa ngre shqetësime për ndikimin që ekspozimi publik i drejtuesit mund të ketë mbi imazhin e institucionit. Shala thekson se deri tani bëhet fjalë për dyshime të hetimit dhe jo për një konstatim përfundimtar të fajësisë, ndaj nuk duhet bërë automatikisht një lidhje mes hetimit ndaj drejtueses dhe funksionimit të tërësishëm të SHISH.
Akuzat për nxjerrje të të dhënave sekrete konsiderohen veçanërisht sensitive. Shala shprehet se nuk beson se janë shitur informacione që cenojnë sigurinë kombëtare dhe i sheh çështjet si një përzierje mes raporteve personale dhe emocionale me funksionin institucional. Ai nënvizon nevojën për një hetim të brendshëm të institucionit dhe për sqarim të partnerëve ndërkombëtarë, me qëllim ruajtjen e besimit reciprok dhe të mekanizmave të sigurisë, duke përmendur se vendi është anëtar i NATO-s.
Hetimi do të përcaktojë përgjegjësitë konkrete të Vlora Hysenit dhe do të shqyrtojë urgjencën e masës së arrestit shtëpiak. Ndërkohë, parashikohet që SHISH të vijojë funksionimin dhe bashkëpunimin me partnerët ndërkombëtarë nën drejtimin e një drejtuesi të ri të komanduar.
