Hetimet për vrasjen e Ilaria Sulës, 22 vjeçare, e cila u vra më 26 mars në Romë, vazhdojnë me Prokurorinë që kërkon dënim prej dy vjetësh për nënën e të dyshuarit, Mark Samson, 23 vjeç. Sipas autoriteteve, gruaja dyshohet se ka pastruar dhomën ku ndodhi krimi, duke hequr gjurmët e gjakut me lecka dhe detergjent, për të fshehur provat e ngjarjes tragjike.
Raportet nga Il Messaggero theksojnë se Nors Manlapaz, nëna e Markut, nuk e denoncoi kurrë të birin për krimin, duke tentuar të fshihte çdo gjurmë të abuzimit. Prokurorja Maria Perna ka rekomanduar një dënim dy vjeçar për të, duke përfituar nga një marrëveshje që parashikon uljen e dënimit, për shkak të mungesës së precedentëve penal. Seanca për këtë çështje është planifikuar për 10 nëntor, ku do të shqyrtohet pranimi i marrëveshjes dhe dënimi i mundshëm me kusht.
Ndërkohë, gjyqi i Mark Samson do të zhvillohet më 12 nëntor, ku ai akuzohet për vrasje të qëllimshme, me motive të kota dhe fshehje të kufomës. Hetuesit kanë zbuluar mesazhe që tregojnë impulsin e tij vrasës, i nxitur nga xhelozia dhe pamundësia për të pranuar përfundimin e marrëdhënies. Sipas informacionit, më 26 mars, ai fillimisht e goditi Ilarian dhe më pas e qëlloi tri herë me një thikë buke në qafë.
Pas krimit, Mark Samson u dyshua se transportoi trupin e viktimës në një shkëmb pranë Capranica Prenestina, ku e hodhi. Pamjet e kamerave të sigurisë konfirmuan se ai kishte udhëtuar vetëm në atë vend. Gjyqtarja hetuese Antonella Minunni përshkroi sjelljen e tij si “të qartë dhe të kontrolluar”, duke theksuar ftohtësinë dhe kontrollin emocional të tij, edhe pasi kishte kryer aktin makabër. Kjo ngjarje ka trazuar opinionin publik dhe ka ngritur pyetje mbi dinamikat e dhunës në marrëdhënie.
