Ka ndërruar jetë në moshën 71-vjeçare, analisti i njohur i çështjeve ndërkombëtare, Janusz Bugajski. Lajmi është bërë publik nga ish-drejtori i Zërit të Amerikës, Elez Biberaj, i cili shprehu hidhërim të thellë për humbjen e mikut dhe kolegut të tij.
Biberaj e përshkroi Bugajskin si një analist të shkëlqyer të çështjeve euroaziatike dhe autor të shumë veprave që kanë ndihmuar në kuptimin e situatave komplekse në këtë rajon. Ai theksoi se Bugajski ishte një mbrojtës i vendosur i demokracisë, qeverisjes së mirë dhe lirisë së shtypit.
Në përkujtim të tij, Biberaj kujtoi vitet e bashkëpunimit në projekte të ndryshme, sidomos ato që kanë të bëjnë me Ballkanin. Ai theksoi intelektin, integritetin dhe përkushtimin e Bugajskit ndaj vlerave që ai i konsideronte të rëndësishme. Biberaj shprehu se mungesa e Bugajskit do të ndihej thellë nga ata që patën fatin ta njihnin dhe punonin me të.
“Do të më mungojë jashtëzakonisht shumë. U prehsh në paqe, Janusz,” ka përfunduar Biberaj.
