Unioni i Gazetarëve Shqiptarë (UGSH) ka reaguar ndaj rritjes së sulmeve verbale dhe gjuhës denigruese kundër gazetarëve, të shfaqura kryesisht në rrjetet sociale dhe gjatë protestave, dhe i konsideron këto veprime si “akte kriminale publike” që duhet të ndëshkohen. Në deklaratë, UGSH shpreh mbështetje për protestat qytetare të dy javëve të fundit, duke i vlerësuar si shprehje të lirë dhe si një kontribut për forcimin e demokracisë dhe për rrugën drejt një Shqipërie më europiane. Megjithatë, Unioni paralajmëron se paralelisht me këto protesta është përshkallëzuar edhe fenomeni i linçimit të gazetarëve që shprehin opinione të ndryshme.
Sipas UGSH, mbi 20 gazetarë të njohur me karrierë të gjatë po përballen çdo ditë me fyerje, etiketime dhe fushata denigruese në internet, të nxitura nga individë apo grupe anonime dhe të politizuara. Unioni thekson se sulmet vijnë nga anonime, aktivistë fanatikë të partive, udhëheqës politikë, persona agresivë, grupe kriminale dhe individë të “kriminalizuar në mendje dhe ndërgjegje”, dhe se përdorimi i gjuhës së urrejtjes ndaj tyre është një akt anticivil dhe kriminal që meriton ndëshkim.
UGSH i bën thirrje institucioneve të drejtësisë, Policisë së Shtetit dhe njësive të krimit kibernetik që të ndërmarrin hetime, të identifikojnë dhe të marrin masa ndaj autorëve të sulmeve më flagrante. Unioni kërkon që gazetarët të denoncojnë rastet dhe të padisin individët përkatës në organet përkatëse, si dhe t’u drejtohen kompanive të rrjeteve sociale për bllokimin dhe penalizimin e llogarive abuzuese. Po ashtu, UGSH apelon për solidaritet midis gazetarëve, duke kërkuar nisjen e fushatës së denoncimit publik të aktivistëve antigazetarë dhe grupeve mbështetëse të tyre.
Deklarata përfundon me nënvizimin se, edhe pse hapësira virtuale është e vështirë për t’u kontrolluar, ekzistojnë mekanizma dhe mundësi reagimi për të reduktuar “ndotjet virtuale”, aktet diskriminuese dhe përdhosjet ndaj individëve apo kategorive profesionale që kryejnë një mision publik.
