Shtetet e Bashkuara dhe Irani kanë nënshkruar në mënyrë elektronike një marrëveshje kornizë për t’i dhënë fund luftës tremujore dhe për rihapjen e Ngushticës së Hormuzit, thanë zyrtarë të lartë të administratës amerikane. Sipas tyre, presidenti Donald Trump dhe nënpresidenti JD Vance e firmosën virtualisht ujdinë, ndërsa kryeparlamentari iranian dhe kryenegociatori i Teheranit, Mohammad Baqer Qalibaf, e nënshkroi atë në emër të Republikës Islamike. Zyrtarisht, dokumenti pritet të nënshkruhet gjatë një ceremonie në Gjenevë më 19 qershor, ndërsa teksti i plotë i memorandumit do të publikohet së shpejti dhe, sipas burimeve, do të ketë “transparencë të plotë”.
Pakti kornizë i jep Uashingtonit dhe Teheranit 60 ditë kohë për të negociuar një marrëveshje të përhershme, duke përfshirë edhe çështje si rezervat e Iranit me uranium të pasuruar në nivel të lartë. Trump e paraqiti momentin si një fitore të SHBA-së, por analistë politikë shprehen të paqartë nëse Uashingtoni ka arritur objektivat e veta në luftën kundër Iranit. Programi bërthamor iranian mbetet i paqartë, dhe konservatorët radikalë vazhdojnë të mbajnë pushtetin në Teheran.
Politologu dhe eksperti gjerman Cornelius Adebahr tha se Trumpi ishte nën presion të madh për ta përmbyllur këtë konflikt dhe po përpiqet ta paraqesë marrëveshjen minimale si një fitore të rëndësishme politike. Adebahr vlerëson se marrëveshja kornë përfaqëson më shumë një ndërprerje të përkohshme të luftimeve se sa një zgjidhje afatgjatë. Sipas tij, qëllimi i ujdisë është krijimi i hapësirës për negociata gjatë 60 ditëve të ardhshme, me synimin për të arritur një marrëveshje më konkrete dhe afatgjatë. Ai thekson se mbetet të shihet nëse zhvillimet në terren do të sjellin ndryshime reale.
Top Channel.
