Prokuroria e Posaçme Kundër Korrupsionit dhe Krimit të Organizuar ka përfunduar hetimet dhe ka dërguar në Gjykatën e Posaçme të Shkallës së Parë kërkesën për gjykimin e procedimit penal nr. 49/3/1 të vitit 2026, në ngarkim të Igli Haxhiaj, i cili është hetuar nën masën e sigurimit “arrest në burg” që prej 27.11.2025. Haxhiaj akuzohet për veprat penale “Shpërdorim i detyrës”, “Zbulim i akteve ose të dhënave sekrete” dhe “Korrupsion pasiv i gjyqtarëve, prokurorëve dhe funksionarëve të tjerë të organeve të drejtësisë”, të parashikuara nga nenet 248, 295/a (par. 3) dhe 319/ç të Kodit Penal.
Hetimet u zhvilluan në kuadër të procedimeve 49/3 të vitit 2023 (nr.49 viti 2019) dhe nr.29 viti 2024, që lidhen me vepra penale si prodhim dhe shitje narkotikësh, trafik narkotikësh, pastrim i produkteve të veprës penale, grup i strukturuar kriminal, si dhe shfrytëzime të tjera penale të parashikuara në Kodin Penal. Këto procedime hetuan në bashkëpunim me një Skuadër të Përbashkët Hetimore me Prokurorinë Distrektuale Antimafia në Breshia, Itali, dhe Prokurorinë Publike të Konfederatës së Zvicrës. Në Shqipëri, hetimet paraprake u koordinuan me shërbimet e policisë gjyqësore të Drejtorisë së Policisë së Shtetit. Hetimet zbuluan një grup të strukturuar kriminal, kryesisht shtetas shqiptarë, i cili synonte trafikimin ndërkombëtar të drogës, duke importuar lëndë nga Amerika e Jugut dhe duke i sjellë përmes rrugëve tregtare në porte të Europës Veriore për t’i transportuar më pas në Itali të fshehura në automjete të rënda.
Në lidhje me veprimet penale që i ngarkohen Haxhiajit: gjatë fazës paraprake të procedimit nr.49/2019, ishte lejuar përgjimi i disa të dyshuarve dhe regjistrimi ambientale në dy automjete përdorur nga anëtari i grupit D.M. Si oficer i policisë gjyqësore në Drejtorinë e Forcës së Posaçme Operacionale, Haxhiaj mori pjesë në grupin hetimor që realizoi vëzhgimet dhe përgjimet dhe, sipas prokurorisë, i ka zbuluar D.M. se ky i fundit ishte objekt i hetimeve dhe të veprimeve të përgjimit, si dhe ka zbuluar përmbajtjen e akteve që përbëjnë “sekret hetimor” (neni 295/a).
Po ashtu, prokuroria pretendon se Haxhiaj ofroi informacion në këmbim të përfitimeve monetare dhe komunikoi me D.M. përmes platformës së enkriptuar SkyECC, duke kërkuar shumën 15.000 euro, çka përbën, sipas akuzës, korrupsion pasiv (neni 319/ç). Nga përmbajtja e bisedave në SkyECC rezulton edhe pjesëmarrje në komunikime lidhur me tregtimin e lëndëve narkotike. Si oficer i policisë gjyqësore, Haxhiaj kishte detyrimin ligjor të ndërmerrte veprime procedurale dhe të informonte prokurorin kompetent; mosveprimet e tij konsiderohen moskryerje të rregullt të detyrës (neni 248).
