Presidenti amerikan Donald Trump po konsideron shpalljen e përfundimit të luftës me Iranin, ndërsa Pentagoni forcon praninë ushtarake në Lindjen e Mesme. Sipas një raportimi të The Wall Street Journal, Trump ka diskutuar më së afërmi këtë mundësi në biseda private me këshilltarët e tij të lartë dhe raportohet se është në favor të një shpalljeje zyrtare të fundit të luftës, duke u mbështetur te besimi se presioni ekonomik ndaj Teheranit mund ta detyrojë Iranin të heqë dorë nga programi bërthamor ose të përballet me një krizë të rëndë të brendshme.
Ndërkohë, administrata amerikane vazhdon me fushatën e saj të presionit ekonomik. Javën e kaluar, Shtetet e Bashkuara nisën Operacionin “Pariah Ekonomik”, që synon goditjen e sektorëve kyç të ekonomisë iraniane. Sektoret e përmendura përfshijnë industrinë e naftës, transportin detar, aviacionin, tregtinë e arit, teknologjinë dhe segmentin e ekonomisë digjitale. Ky operacion përbën një komponent të rëndësishëm të strategjisë së Uashingtonit për të rritur kostot ekonomike për Teheranin.
Megjithatë, në planin ushtarak Pentagoni po përgatitet për një zhvillim të zgjatur të konfliktit. Raporti i WSJ nënvizon se ushtria amerikane po zgjeron dislokimet në rajon, duke sinjalizuar se zgjidhja e konfliktit mund të zgjatë edhe gjatë vitit të ardhshëm. Aktualisht, SHBA kanë rreth 50 mijë trupa dhe 19 anije luftarake të vendosura në Lindjen e Mesme. Midis këtyre forcave janë dy aeroplanmbajtëse dhe 13 shkatërrues të pajisur me raketa të drejtuara.
Prania e shtuar ushtarake synon t’i sigurojë presidentit më shumë fleksibilitet për të reaguar sipas zhvillimeve në terren. Ndërsa Shtëpia e Bardhë po diskuton mundësinë e deklarimit zyrtar të mbylljes së konfliktit, përgatitjet e vazhdueshme ushtarake tregojnë se administrata nuk po përjashton një skenar të zgjatur. Top Channel.
