Donald Trump ka refuzuar propozimin e fundit të Iranit, duke e cilësuar atë si të papranueshëm. Në një intervistë të dielën për Kanalin 12 të Izraelit, ai tha se kundërpropozimi i Teheranit, i lidhur me Ngushticën e Hormuzit dhe programin bërthamor, nuk paraqet një mundësi për Shtetet e Bashkuara. “Propozimi i ri iranian nuk është i pranueshëm për mua. E studiova atë, studiova gjithçka, nuk është i pranueshëm”, deklaroi Trump, duke shtuar se nuk do të pranonte lehtë propozimet nga Teherani: “Iranianët duan të bëjnë një marrëveshje, por unë nuk jam i kënaqur me atë që ofruan”.
Sipas njoftimit të Teheranit, propozimi iranian u publikua pas ankthe se SHBA-ja kishte dërguar një plan 14-pikësh përmes ndërmjetësit të Pakistanit, dhe pala iraniane po shqyrtonte përgjigjen e Uashingtonit. Megjithatë, një zëdhënës i Ministrisë së Jashtme iraniane theksoi se “në këtë fazë, ne nuk po zhvillojmë negociata për programin bërthamor.”
Propozimi iranian i paraqitur si përgjigje ndaj një plani me nëntë pika të Uashingtonit kërkonte një ndërprerje të plotë të armiqësive, duke hedhur poshtë idenë e një armëpushimi dy-mujor të propozuar nga amerikanët. Teherani kërkonte që çështjet kryesore të zgjidheshin brenda 30 ditësh dhe theksonte se përparësia duhet të ishte përfundimi i luftës e jo një armëpushim i përkohshëm. Ky qëndrim i Iranit vjen ndërsa palët shkëmbejnë plane dhe kundërpropozime që lidhen me aspektet ushtarake dhe të programit bërthamor.
Në të njëjtën intervistë, Trump trajtoi edhe çështjen e mbështetjes ndaj kryeministrit izraelit Benjamin Netanyahu dhe idenë e faljes për të. Ai vlerësoi rolin e Netanyahut si udhëheqës në kohë lufte: “Ai është një kryeministër në kohë lufte. Izraeli nuk do të ekzistonte nëse nuk do të ishim unë dhe Bibi, me këtë rend”, dhe shtoi se Izraeli ka nevojë për një kryeministër që mund të përqendrohet tek lufta dhe jo tek “budallallëqet.”
Burimi i tekstit: Top Channel.
