Tre persona kanë vdekur pas një shpërthimi të dyshuar të hantavirusit në një anije kroçere që po lundronte në Oqeanin Atlantik, ka bërë të ditur Organizata Botërore e Shëndetit (OBSH), e cila po koordinon hetimet dhe masat e emergjencës. Autoritetet kanë konfirmuar një rast të hantavirusit, ndërsa pesë raste të tjera po hetohen si të dyshuara.
Hantavirusi është një grup virusesh që transmetohen kryesisht nga brejtësit; zakonisht lidhet me kontaktin me brejtës të infektuar, por në raste të veçanta mund të shkaktojë sëmundje të rënda të frymëmarrjes dhe të përhapet mes njerëzve. OBSH-ja po ndihmon në koordinimin e evakuimeve mjekësore dhe në vlerësimin e rrezikut për shëndetin publik të pasagjerëve dhe ekuipazhit që ndodhen ende në bord.
Sipas autoriteteve, një pasagjer 70-vjeçar vdiq në bord, ndërsa bashkëshortja e tij 69-vjeçare vdiq pas evakuimit dhe trajtimit në spital në Johanesburg. Po ashtu, një shtetas britanik 69-vjeçar ndodhet në kujdes intensiv. Trupi i një prej viktimave është dërguar në Shën Helena, ndërsa pacientë të tjerë janë evakuuar për trajtim mjekësor.
Anija MV Hondius kishte nisur udhëtimin nga Ushuaia më 20 mars dhe ishte planifikuar të mbërrinte në Kepi i Gjelbër më 4 maj. Ajo operohet nga kompania holandeze Oceanwide Expeditions dhe ka kapacitet deri në 170 pasagjerë. Autoritetet dhe OBSH-ja po përqëndrojnë përpjekjet në menaxhimin e situatës së emergjencës, evakuimin e të sëmurëve dhe hetimin e origjinës së ngjarjes.
Ngjarja është cilësuar nga autoritetet si një situatë serioze shëndetësore ndërkombëtare dhe hetimet vazhdojnë ndërsa autoritetet shëndetësore dhe ekipet e emergjencës monitorojnë gjendjen e pasagjerëve dhe ekuipazhit, si dhe marrin masa për parandalimin dhe trajtimin e rasteve të dyshuara. Top Channel.
