Ambasada e Iranit në Londër ka shkaktuar shqetësime për sigurinë në Mbretërinë e Bashkuar pas thirrjes që u bëri iranianëve që jetojnë në Britani të regjistrohen në programin “Jan Fada” (përkthyer si “sakrificë e jetës”). Sipas raportimit të Daily Mail, mesazhi në gjuhën perse në kanalin zyrtar të ambasadës në Telegram iu drejtua “bashkatdhetarëve krenarë iranianë” dhe i ftonte ata të shprehnin interes për programin si shenjë “solidariteti, besnikëri dhe zelli kombëtar”. Postimi përmbante thirrje të drejtpërdrejta për sakrificë: “Le t’i japim të gjithë trupat tanë për t’u sakrifikuar, sepse është më mirë sesa t’ia dorëzojmë vendin tonë armikut”.
Megjithë paraqitjen si iniciativë që “nuk promovon asnjë formë armiqësie”, përmbajtja ka ngjallur reagime të forta dhe shqetësime. Roger McMillan, ish-drejtor sigurie i Iran International, e cilësoi situatën “të tmerrshme” dhe paralajmëroi se mund të jetë një përpjekje për të radikalizuar individë në internet dhe për t’i nxitur ata të veprojnë në mbështetje të regjimit iranian brenda territorit britanik. Nadeh Fala nga organizatat për të drejtat e njeriut e konsideroi zhvillimin një “thirrje zgjimi” për autoritetet britanike dhe kërkoi që Garda Revolucionare e Iranit të shpallet zyrtarisht organizatë terroriste, duke thënë se struktura po përpiqet të ndikojë dhe të rekrutojë mbështetës edhe jashtë Iranit.
Programi i drejton të interesuarit drejt platformës konsullore “Mikhak”, e përdorur zakonisht për shërbime administrative si aplikimet për pasaporta dhe regjistrimet civile. Ngjarja ndodh ndërsa në Londër mbizotëron një klimë e tensionuar; autoritetet po hetojnë incidente të lidhura me grupe të dyshuara pro-iraniane. Kryeministri Keir Starmer ka paralajmëruar më parë për mundësinë e shpalljes së Gardës Revolucionare si organizatë terroriste, megjithëse ligji përkatës ende nuk është miratuar.
Ambasada iraniane nga ana e saj insiston se iniciativa synon vetëm të forcojë ndjenjën e përgjegjësisë kombëtare dhe nuk ka lidhje me nxitjen e dhunës, duke e cilësuar kritikat si të pabazuara.
