Nivelet rekordisht të ulëta të ujit në lumin Danub kanë zbuluar mbetje të periudhës naziste në Evropë, duke nxjerrë në sipërfaqe dhjetëra anije gjermane të Luftës së Dytë Botërore që prej dekadash ishin në shtratin e lumit. Në zonën pranë qytetit të Prahovos në Serbi, në kufi me Rumaninë, rrënojat e disa anijeve janë bërë të dukshme për shkak të thatësirës së madhe; një anije luftarake e dëmtuar rëndë shihet mbi një breg ranor që zakonisht është nën ujë. Të tjera mbeten pjesërisht të zhytura dhe besohet se disa mund të kenë ende armë dhe municione në bord.
Anijet i përkisnin flotës gjermane të Detit të Zi dhe u fundosën qëllimisht nga forcat naziste në shtator të vitit 1944 për të penguar përparimin e ushtrisë sovjetike. Sipas historianëve, deri në 200 anije luftarake u fundosën në atë periudhë, ndërsa Gjermania naziste vazhdoi luftën deri në kapitullimin e majit 1945. Rrënojat janë shfaqur edhe gjatë thatësirave të mëparshme, por më pas janë zhdukur sërish nën ujë; kësaj here niveli i ulët ka bërë që një numër i madh prej tyre të bëhen sërisht të dukshme.
Qeveria serbe ka tentuar më herët t’i largojë disa rrënoja, por operacionet janë komplikuar nga prania e eksplozivëve dhe municioneve, ndaj shumë prej tyre kanë mbetur në vend, duke krijuar rrezik për lundrimin dhe sigurinë. Përveç Serbisë, mbetje të tjera të Luftës së Dytë Botërore u zbuluan përgjatë Danubit: në Budapest u gjet një motoçikletë ushtarake gjermane, tashmë e ekspozuar në muzeun e Ministrisë së Mbrojtjes, ndërsa në Sllovaki autoritetet gjetën një bombë britanike të pashpërthyer rreth 700 kilogramë, e cila u transportua me mjet të posaçëm dhe u shpërthye në mënyrë të kontrolluar në një gropë rreth pesë metra të thellë.
Danubi, i cili përshkon 10 shtete dhe është lumi i dytë më i gjatë në Evropë, po përballet me nivele kritike uji. Thatësira e zgjatur dhe temperaturat rekord kanë ulur nivelet e lumenjve, duke vështirësuar transportin, lundrimin dhe furnizimin e termocentraleve që përdorin ujë për ftohje. Kushtet ekstreme janë përkeqësuar nga vala e të nxehtit në Evropën Qendrore dhe Lindore; vende si Sllovakia, Austria dhe Hungaria regjistruan temperatura të pazakonta, me një rekord kombëtar prej 42°C në Dolné Plachtince të Sllovakisë. Rënia e nivelit të Danubit po nxjerr në sipërfaqe anije, mjete ushtarake dhe municione që kanë qëndruar të fshehura nën ujë për më shumë se tetë dekada.
