Tërmeti i fuqishëm me magnitudë 5.3 ballë të shkallës Rihter që goditi Follorinën në Greqi mbrëmjen e djeshme, ka shkaktuar dëmtime të banesave edhe në bashkinë e Devollit.
Bëhet me dije se aktualisht janë bërë 17 kërkesa për dëmtime të banesave në disa fshatra.
Institucioni i perfektit në bashkëpunim me bashkinë po bën verifikimin e kërkesave të bëra. Sikurse në bashkinë Devoll edhe në bashkinë Pustec po vijon puna për verifikimin e dëmeve nga tërmeti.
Sipas komunikimit me kryetarin e bashkisë Devoll, Eduart Duro, grupet e emergjencave civile kanë nisur verifikimin në terren për rastet e raportuara.
Paraprakisht thuhet se banesat, për të cilat raportohet se janë dëmtuar janë banesa të vjetra dhe të amortizuara, të cilat kanë patur probleme edhe më parë.
Megjithatë në fund të verifikimeve do të vendoset nëse kemi të bëjmë me dëmtime serioze nga tërmeti, nëse banesat janë të banueshme ose jo, e më pas do të merren masa për ndërhyrje.
