Një polemikë në distancë është ndezur mes Britanisë dhe Francës pas deklaratës së partisë populiste dhe anti-emigracion “Reforma” dhe kreut të saj, Nigel Faraga, se do të përdorë Flotën Ushtarake Detare për të kthyer mbrapsht gomonet me emigrantë që tentojnë të kalojnë La Manshin nga Franca ose Belgjika drejt brigjeve angleze. Faraga tha se do të ndërmarrë “operacionin më të madh ushtarak në shumë dekada në La Mansh” për të bllokuar mbërritjet, një përshkallëzim i planit të partisë për të mbyllur rrugën e emigracionit, ndërsa Reforma po pëson rënie drastike në sondazhe dhe humbi kryesimin prej 16 muajsh pas ardhjes në pushtet të kryeministrit të ri Andy Burnham.
Paralelisht, partia deklaroi se nëse fiton zgjedhjet, brenda dy javësh qeveria e saj “do ndaloj dhe nuk do ketë më gomone që kalojnë La Manshin drejt Anglisë.” Njoftimi ka hasur skepticizëm nga ish-figurat e larta të Flotës Ushtarake Detare britanike dhe nga autoritetet franceze. Faraga është cituar të ketë thënë: “nëse Flota Detare Mbretërore nuk është aty për të mbrojtur këtë vend nga invazioni atëherë sinqerisht, nuk shoh se ç’kuptim ka që të ekzistoj”.
Kalimet me gomone janë ulur dukshëm përgjithësisht, megjithëse javën e kaluar u regjistrua një rritje e dukshme e tyre. Disa figura të njohura dhe ekspertë të mbërritjes kanë shprehur dyshime mbi efektshmërinë e këtij plani. Një ekspert mbrojtjeje vuri në dukje dy problematika: se Flota Ushtarake Mbretërore nuk disponon anijet për një veprim të tillë dhe se, si Ushtria dhe Forcat Ajrore, edhe Flota është një forcë e armatosur — duke shtuar se nuk beson se po propozohet të përdoren armë ndaj njerëzve në La Mansh. Ai u shpreh: “kemi të bëjmë me dy problematika në këtë histori. E para, Flota Ushtarake Mbretërore nuk ka anijet për një veprim të tillë, dhe e dyta, ajo që është më serioze është Flota Ushtarake Detare, njësoj si Ushtria, e Forcat Ajrore, janë forca të armatosura. Dhe nuk besoj se këtu po propozohet të fillojmë të shtim me armë kundër njerëzve nëpër La Mansh”.
Autoritetet e larta franceze reaguan duke theksuar se një veprim i tillë do të përbënte shkelje të sovranitetit francez dhe të ligjeve ndërkombëtare dhe të lundrimit detar, dhe se mund të çonte në një konfrontim ushtarak mes dy aleatëve të NATO-s.
