Top Channel ka siguruar dosjen e prokurorisë së Sarandës për ngjarjen në Ksamil ku u vra me thikë turisti 20-vjeçar Luis Miguel Varela Mendes. Dosja, e marrë nga gazetarja Anila Hoxha, përmban pamjet e kamerave dhe dinamika e plotë të përleshjes, me të akuzuar Sokrat Lipan alias Sokrat Vata si autor i sulmit me thikë. Nga materiali rezulton se konflikti nisi rreth orës 05:15 të datës 18 gusht, kur një grup turistësh u përfshi në një grindje fizike me disa persona të tjerë, e cila u përshkallëzua me grushte dhe ndjekje, duke vijuar edhe në zonën e plazhit.
Pamjet e sigurisë tregojnë se në orën 05:14:24 disa shtetas dolën nga ambientet e lokalit “Principotes” dhe u ndodhën tek rërat pranë “Paradise”, ndër ta Ibrahim Lemoie, Sudae Akmahmat, Florian Cetina dhe Luis Mendes, i veshur me bluzë të bardhë me shkrim të zi në pjesën e pasme. Në 05:15:22 afrohen nga parkimi Davit Heuertvent dhe Sokrat Lipan, i veshur me këmishë të bardhë. Rreth 05:16:39 Sokrat duket i shtyrë nga një person me bluzë të bardhë dhe shkon drejt shezlloneve; më pas e ndjek një person dhe e ndjek atë drejt parkimit.
Në 05:16:54 Sokrat vrapon drejt shtetasit Ibrahim Lemoie, i cili përplaset me shezllonet dhe bie, dhe Sokrat e godet atë. Në 05:17:14 Luis Mendes i afrohet dhe e shtyn Sokratin, i cili bie; më pas ngrihet dhe i afrohet Mendes, duke filluar t’i godasë. Në 05:17:20 Davit Heuertvent dhe Sokrat godasin Luis Mendes, ndërsa Sudae Akhmat ndërhyn për ta ndihmuar Mendës dhe godet Sokratin. Rreth 05:17:35-05:17:46 Serxhi Selimi godet me grushta Ibrahim Lemoie; në këto momente Mendes përpiqet të largohet dhe hidhet brenda detit.
Në 05:17:53 Luis Mendes kthehet nga ana jugore e plazhit, goditet nga Serxhi Ademi me grushta dhe shtyhet në det; në 05:18:04 del nga uji dhe ecën drejt shezlloneve, me bluzën e bardhë të njomur nga gjaku. Në 05:18:24 Davit Heuertvent largohet drejt ambienteve të brendshme të Principotes, i gjakosur në pjesën e përparme të rrobave dhe duke u fshehur. Në 05:20:28 largohet edhe Sokrat Lipan, me bluzën e bardhë të njollosur me gjak, i shoqëruar nga kamarieri Ildi Cekani drejt lokalit Principotes. Përveç Sulmit me thikë nga Sokrat Lipan, dosja përmend dyshimet se David Heurtevent e ka goditur me grushte viktimën gjatë konfliktit.
