Moise Kean dhe influenceri Kristian Pengwin u përfshinë në një përplasje publike pas komenteve kritike të Pengwin për paraqitjen e sulmuesit të Fiorentinës dhe Kombëtares italiane në ndeshjen me Bosnjën. Pengwin vuri në dukje rastin kur Kean, i vetëm përpara portierit me rezultatin 1-0 dhe skuadrën me 10 lojtarë, e gjuajti jashtë dhe zëvendësimin e tij në minutën e 72, duke i vlerësuar paraqitjet e këtij sezoni me notën “4”: “Disa momente kyçe… për notën 4”.
Reagimi i Kean ishte i menjëhershëm dhe nisën debate në rrjetet sociale, me futbollistin që e ftoi influencerin për një takim ballë për ballë: “Vëlla, shihemi dhe e mbyllim aty. Të gjithë janë të zotët pas një ekrani… takohemi dhe e mbyllim këtu. Të jesh i sigurt se do të të bëj që të mos kesh më dëshirë të flasësh”. Pengwin publikoi më pas të gjithë bisedën.
Gazetarët e programit italian “Le Iene” ftuan Pengwin të shkonte në Firence për të zhvilluar takimin, të cilin influenceri e pranoi. Takimi u ndez me Kean që iu hakërrye: “Të mbys me shkelma, të shkatërroj, vëlla. Por ti nuk e di.” Pengwin u përpoq ta qetësonte ndërsa në takim ndërhyri gazetari i “Le Iene”, Stefano Corti, që shoqëroi influencerin. Përballë pyetjes së gazetarit “Duam vetëm të kuptojmë se çfarë po ndodh… Çfarë ka bërë ai”, Kean u shpreh për Pengwin: “Ai është një dështak. Është i pari që u mora… Jemi qenie njerëzore, të gjithë gabojnë. Unë nuk kam thënë kurrë ndonjë gjë por ai flet shumë.”
Pas momentit të tensionit Kean u kthye në shtëpi, por më vonë pranoi të takohej sërish me gazetarin dhe, me tone më të qeta, foli për përgjegjësinë dhe nevojën për të pranuar kritikat: “Duhet të kuptosh se jemi persone normalë. Gabojmë, edhe ne jemi qenie njerëzore… kritikat për atë që bëjmë duhen pranuar. Gjithsesi, unë doja të kërkoja ndjesë… A do të bëja paqe me Pengwin? Po, por për mua mbyllet këtu.” Kean shtoi se gjithnjë ka ditur që duhet të japë më shumë dhe se incidenti ishte një goditje, por se duhet parë përpara.
