Një grup anonim hakerash, i vetëquajtur CikLeak, pretendon se ka ndërhyrë në sisteme kompjuterike të lidhura me infrastrukturën zgjedhore të Rusisë vetëm pak ditë para nisjes së votimit për parlamentin e ri. Grupi thotë se ka siguruar qasje në sistemet e Komisionit Qendror të Zgjedhjeve dhe në kompania që kanë punuar për zhvillimin e platformës shtetërore Vybory, e përdorur për administrimin e zgjedhjeve.
Sipas CikLeak, materialet e vjedhura përfshijnë dokumente të brendshme, konfigurime serverësh, fjalëkalime dhe komunikime midis punonjësve të Komisionit dhe kompanive kontraktuese, duke përfshirë edhe gjigantin rus të telekomunikacionit Rostelecom. Materialet i janë dorëzuar mediës investigative ruse “Important Stories”, e cila deklaroi se i kishte verifikuar dokumentet.
Megjithatë, nga informacioni i publikuar nuk rezulton e qartë se sa thellë kanë depërtuar hakerët në infrastrukturën zgjedhore dhe nëse kanë arritur të kenë qasje në sistemet që përdoren drejtpërdrejt për votimin ose për numërimin e votave. Mbetet e paqartë nëse ndërhyrjet kanë prekur komponentë që ndikojnë në vetë procesin e votimit ose vetëm në sistemet administrative dhe komunikimet përkatëse.
CikLeak ka deklaruar gjithashtu se nuk synon të ndërpresë procesin e votimit apo të pengojë punën e komisioneve zgjedhore. Sipas grupit, qëllimi i shpërndarjes së materialeve është të zbulohet mënyra se si funksionon sistemi zgjedhor rus dhe, siç thonë vetë hakerat, të evidentohen mundësitë për manipulim të rezultateve. Nuk janë dhënë detaje shtesë teknike për natyrën e pushtimit, metodat e përdorura për aksesimin e rrjeteve, apo përmasat e dëmeve të shkaktuara në sistemet e pretenduara të komprometuara.
Lajmi është raportuar nga Top Channel, duke u mbështetur në materialet që grupi i dorëzoi “Important Stories” dhe në deklaratat e vetë CikLeak.
