Referuar një videoje që po qarkullon në rrjetet sociale, ku një 17-vjeçare dhunohet nga shoqet e saj, prof. Majlinda Keta, eksperte në fushën e arsimit, sociologjisë dhe politikave arsimore, kërkon ndalimin e publikimit të materialit. “Do të preferoja të mos publikohej”, thotë ajo, duke vënë në dukje se tranzicioni dhe faktorë të tjerë po nxjerrin në pah fytyrën e një shoqërie që çdo ditë i largohet vlerave.
Keta flet për fenomenin e “prindërimit të tronditur” dhe publikon të dhëna nga një studim i Fakultetit të Shkencave Sociale mbi dhunën dhe bullizimin te adoleshentët. Ajo deklaron se “4 deri në 12 orë fëmija qëndron në ekran, i pakontrolluar” dhe thekson se shoqëria jonë ka kaluar në një fazë ku “nuk dallon më djali nga vajza për dhunën që përdorin”.
Në radhë të saj, psikologia Treska jep këshilla praktike për prindërit: për nënat që rrisin vajza dhe për ato që rrisin djem. Ajo thotë se “Nuk mundet një adoleshente të bëjë thonjtë, të bëjë vetullat si një 20-vjeçare. Mos lejoni djemtë 12–14 vjeç të shkojnë me pushime vetëm në jug”.
Profesorja Keta kërkon ndërhyrje të menjëhershme institucionale dhe një strategji të përgjithshme për të adresuar fenomenet e dhunës dhe bullizimit. Ajo propozon që në vitin e ri akademik të zyrtarizohen “klasat prindërore” si pjesë e masave parandaluese dhe edukative. Më tej, Keta këmbëngul që viti i ri shkollor të shpallet “Viti i Etikës”, një iniciativë që synon vendosjen e përgjegjësive dhe respektimin e standardeve etike nga të gjithë aktorët e shkollës: drejtuesit, mësuesit, prindërit, nxënësit dhe komuniteti.
Sipas saj, rritja e përqendrimit te etikë do të standardizonte liritë dhe përgjegjësitë e secilit aktor në sistemin arsimor dhe do të kontribuonte në përballimin e problemeve që evidentohen te adoleshentët. (Top Channel)
