SPAK reagoi pas raportimeve mediatike lidhur me një kallëzim të bërë në Itali ndaj ish-kreut të Prokurorisë së Posaçme, Altin Dumani, duke sqaruar rrethanat dhe kronologjinë e veprimeve procedurale. Shtetasi Petrit Çela i është drejtuar drejtorit të SPAK me kërkesë për përjashtimin e prokurorit Altin Dumani nga procedimi penal nr. 193/2023, në të cilin të pandehur janë Marjus Lulaj dhe Mario Çela, familjarë të tij, me kërkesat e paraqitura më 20 maj dhe 18 qershor 2026. Drejtuesi i SPAK, pasi vlerësoi kërkesën dhe aktet e paraqitura, me vendimin e datës 19.06.2026 vendosi “Mospranimin e kërkesës” si të pambështetur në ligj dhe në prova.
Nga dokumentacioni i paraqitur rezulton se në Prokurorinë pranë Gjykatës së Veronës, Itali, është regjistruar procedimi penal nr. R.G.N.R. 3514/2026 – R.G. GIP 2877/2026 për veprën e “Shpifjes” (calunnia), e parashikuar nga neni 368 i Kodit Penal italian, mbi bazën e kallëzimit të paraqitur nga Petrit Çela ndaj Altin Dumanit. Prokuroria e Republikës pranë Gjykatës së Veronës, pas shqyrtimit të akteve, ka paraqitur më 21.04.2026 kërkesë për arkivim (richiesta di archiviazione), e depozituar më 14.05.2026. Kundër kësaj kërkese, Petrit Çela ka paraqitur kundërshtim (opposizione) më 11.05.2026, çka çoi në caktimin e një seance gjyqësore pranë Seksionit GIP/GUP të Gjykatës së Veronës.
Nga aktet rezulton se i vetmi element që lidh prokurorin Altin Dumani me bashkëpunimin ndërkombëtar është nënshkrimi i tij në cilësinë e Drejtuesit të Prokurorisë së Posaçme i një shkrese institucionale më 11.07.2024 dhe i një Marrëveshjeje më 26.08.2024 për krijimin e një Skuadre të Përbashkët Hetimore (JIT) mes Prokurorisë së Posaçme dhe Prokurorisë së Republikës pranë Gjykatës së Veronës, nismë e autoriteteve italiane në kuadër të procedimit penal nr. 10792/2023. Prokurori Dumani nuk ka qenë pjesë e grupit hetimor të procedimeve nr. 10792/2023 (Itali) dhe nr. 123/2024 (Prokuroria e Posaçme), nuk ka kryer veprime hetimore, marrje në pyetje, sekuestrime apo kërkesë për sekuestrim, dhe ka marrë dijeni për ekzistencën e procedimit penal në Itali vetëm në maj 2026, pas kërkesës për arkivim nga ana e Prokurorisë italiane.
Kronologjia tregon lidhjen ndërmjet kallëzimit të paraqitur në Itali dhe interesit familjar të kallëzuesit Petrit Çela në procedimin penal nr. 193/2023, si dhe përdorimin e faktit të kallëzimit si bazë për kërkesën e përjashtimit të prokurorit të çështjes.
