Prokuroria e Posaçme kundër Korrupsionit dhe Krimit të Organizuar ka kërkuar në Gjykatën e Posaçme të Shkallës së Parë caktimin e masave të sigurimit për dy shtetas, M. L. (alias G.) dhe E. L., në kuadër të procedimit nr.55 të vitit 2024, për veprat penale “Prodhim dhe shitje e narkotikëve” në formën e bashkëpunimit dhe të grupit të strukturuar kriminal (nenet 283/1, 28/4 dhe 334/1 të Kodit Penal) dhe “Grup i strukturuar kriminal” në formën e pjesëmarrjes (neni 333/a/2 i Kodit Penal). Me vendimin nr. 28, datë 14.05.2026, Gjykata caktoi masën e sigurisë “arrest në burg” (neni 238 i Kodit të Procedurës Penale) për M. L., ndërsa për E. L. vendosi masat “Detyrimi për t’u paraqitur në policinë gjyqësore” dhe “Ndalimi i daljes jashtë shtetit” (nendet 234 dhe 233 të Kodit të Procedurës Penale).
Hetimet për këtë procedim u realizuan në bashkëpunim të ngushtë me autoritetet e drejtësisë daneze dhe Byronë Kombëtare të Hetimit (BKH). Autoritetet daneze në gusht 2023 kanë regjistruar procedimin penal nr. 0100-71282-00102-23, të quajtur “Operacioni Bacchus”, në të cilin hetimi përfshinte një grup shtetasish shqiptarë dhe të huaj që zhvilluan aktivitet kriminal të trafikimit dhe shpërndarjes së heroinës në Mbretërinë e Danimarkës. Sipas hetimeve, aktiviteti u zhvillua nga 1 tetor 2023 deri më 23 janar 2024, në shtatë episode, gjatë të cilave anëtarët importuan heroinë në Danimarkë përmes Suedisë. Lënda narkotike përgatitej për shitje në tregun danez, duke u përzier me paracetamol dhe kafeinë për rritjen e fitimit.
Hetimet paralele të prokurorive të dy vendeve kanë mundësuar identifikimin dhe procedimin në Danimarkë të tre personave (dy shtetas shqiptarë dhe një i huaj), si dhe identifikimin në Shqipëri të dy shtetasve të tjerë shqiptarë të përfshirë në aktivitetin kriminal të prodhimit dhe shitjes së narkotikëve. Më 14.05.2026, Drejtoria e Përgjithshme e Policisë së Shtetit ekzekutoi masat e sigurimit personale për të dy të dyshuarit. Hetimet vazhdojnë për administrimin e provave lidhur me përfshirjen e personave të tjerë. Prokuroria e Posaçme falenderon autoritetet daneze dhe Drejtorinë e Përgjithshme të Policisë së Shtetit për mbështetjen.
