SPAK ka dërguar në gjyq 11 persona, të akuzuar për trafik ndërkombëtar të lëndëve narkotike drejt Finlandës, duke zbardhur taktikat dhe veprimtarinë e tyre. Prokuroria e Posaçme kundër Korrupsionit dhe Krimit të Organizuar njofton se ka përfunduar hetimet paraprake dhe ka dërguar në Gjykatën e Posaçme të Shkallës së Parë kërkesën për gjykim për procedimin penal nr.147/1, të vitit 2023, ndaj: Besnik Spata; Ermelind Pupa (alias Ermelind Myzyri); Erind Agalliu (alias Erind Teneqexhiu); Geraldo Seferaj; Dorjan Luzaj; Kevin Qevani (alias Bojken Qevani); Toni Kota (alias Elton/Thoma/Toni Tavani); Eltion Myftari (alias Eltjon Miftari); Ledjon Hoxha; Altin Musta; dhe Nikollaq Godo (Pavjol Gode). Të pandehurit akuzohen kryesisht për prodhim dhe shitje të narkotikëve, trafikim të narkotikëve, krijim/organizim/drejtim të grupi të strukturuar kriminal dhe kryerje veprash penale nga organizata kriminale; Godo akuzohet për moskallëzim të krimit.
Procedimi është ndarë nga çështja penale nr.147 e vitit 2023. Hetimet u zhvilluan nga një Skuadër e Përbashkët Hetimore, aktive që nga 21 nëntori 2023, e formuar mes Prokurorisë së Posaçme dhe Policisë Qendrore Kriminale të Finlandës, Departmentit të Policisë së Finlandës Jugperëndimore dhe Departmentit të Policisë së Helsinkit. Gjatë hetimit u përdorën metoda speciale hetimi, përfshirë përgjime telefonike dhe regjistrime të fshehta fotografike/filmike në vendet publike, dhe u shkëmbyen informacione e prova në kohë reale me Byronë Kombëtare të Finlandës.
Sipas provave, prej vitit 2022 e në vazhdim, grupe të strukturuara me anëtarë shqiptarë dhe të huaj trafikonin drejt Finlandës sasi të mëdha lëndësh me rrezikshmëri të lartë (marihuanë, amfetaminë, tableta ekstazi, kokainë etj.), të cilat shiteshin dhe shpërndaheshin në disa qytete të Finlandës për të siguruar të ardhura të kundraligjshme. Hetimi dokumenton një sërë transaksionesh dhe transportesh konkrete: shitje dhe dërgesa amfetamine, kokainë e marihuanë në Helsinki, Espoo, Vantaa, Porvoo, Turku e qytete të tjera, gjatë periudhës 2021–2024, përfshirë edhe trafikim përmes shërbimit postar të mbi 200 kg marihuanë nga Spanja në Finlandë (15.4.2024–8.8.2024) dhe dërgime të shumta të tabletave ekstazi dhe barnave opioidike. Në hetime dhanë ndihmën Zyra e Oficerit Ndërlidhës së Vendeve Nordike për Shqipërinë dhe Kosovën dhe “Rrjeti @ON”, i financuar nga Komisioni Europian dhe i drejtuar nga DIA. Prokuroria dhe policia vijojnë hetimet për identifikimin e bashkëpunëtorëve të tjerë të përfshirë.
