Sekretariati i Etikës do të mblidhet nesër për të shqyrtuar kërkesën e Partisë Socialiste për përjashtimin nga punimet e Kuvendit për 60 ditë të deputetit Agron Shehaj. Më parë, PS kishte kërkuar marrjen e masës disiplinore dhe referimin e çështjes pranë Prokurorisë së Posaçme (SPAK) pas një incidenti që ndodhi gjatë shqyrtimit të një dokumenti konfidencial lidhur me një marrëveshje huaje direkte mes Shqipërisë dhe Shteteve të Bashkuara të Amerikës, në kuadër të financimit të jashtëm ushtarak.
Në një kërkesë drejtuar kryetarit të Kuvendit, Niko Peleshi, dhe Sekretariatit për Procedurat, Votimet dhe Etikën, PS kërkon që ndaj Shehajt të merret masa e përjashtimit nga pjesëmarrja në komisione dhe seanca plenare për 60 ditë. Sipas shkresës së depozituar, deputetët janë informuar se dokumenti përmbante informacion të klasifikuar dhe mund të konsultohej vetëm në ambientet e përcaktuara nga Kuvendi, pas nënshkrimit të deklaratës së konfidencialitetit.
PS pretendon se Agron Shehaj, pasi është paraqitur në sallën ku mbahej dokumenti, ka kërkuar ta marrë kopjen fizike me vete, por është kundërshtuar nga stafi i Kuvendit. Në kërkesë thuhet se deputeti “e ka marrë me forcë materialin dhe është larguar bashkë me të”. Një këshilltare e Kuvendit, e cila sipas dokumentit e ka ndjekur për ta rimarrë materialin, është rrëzuar nga shkallët dhe ka pësuar dëmtime.
Në kërkesë theksohet se sjelljet e Agron Shehajt kanë qenë “të përsëritura të dhunshme dhe agresive” dhe sipas PS kanë vendosur në rrezik këshilltaren, e cila është gjendur e pambrojtur përballë kësaj sjelljeje. Dokumenti i depozituar kërkon shqyrtim institucional të ngjarjes dhe zbatimin e masave disiplinore për deputetin.
Sekretariati i Etikës do të shqyrtojë rastin në mbledhjen e parashikuar, ndërsa organet përkatëse të Kuvendit duhet të vendosin mbi kërkesën e PS për përjashtim dhe procedimin e mëtejshëm disciplinor.
