Një tender 12 milionë eurosh, një kompani e vetme në garë dhe 11 borëpastruese që duhet të ishin prova e kapacitetit teknik. Por dokumentet ngrenë pikëpyetje serioze.
ARRSH ka hapur një nga tenderët e rëndësishëm për mirëmbajtjen e rrugëve në Shqipëri.
Bëhet fjalë për Kontratën B, Loti 2, me fond limit rreth 1.1 miliardë lekë, ose afro 12 milionë euro, për mirëmbajtjen e 294.1 kilometrave rrugë në rajonin qendror dhe verilindor.
Në këtë kontratë përfshihen akse të rëndësishme si Tiranë–Rinas–Durrës, Thumanë–Milot, si edhe rrugët në drejtim të Bulqizës dhe Peshkopisë.
Por ajo që bie në sy është se, sipas vlerësimit të ARRSH-së, për këtë lot është kualifikuar vetëm Bami sh.p.k.
Pra, për një kontratë rreth 12 milionë euro, kompania mbetet e vetme në garë.
Dhe këtu fillojnë pikëpyetjet.
11 borëpastruese ose skualifikim
Dokumentet e tenderit përcaktojnë qartë nevojën për 11 mjete borëpastruese.
Nuk bëhet fjalë për një kërkesë dytësore.
Është një nga kapacitetet teknike që operatori duhet të dëshmojë për të përmbushur kontratën.
Bami sh.p.k. ka paraqitur dokumentet për mjetet që deklaron se ka në dispozicion.
Por disa prej tyre, sipas dokumenteve zyrtare të transportit, ngrenë pikëpyetje që kërkojnë përgjigje nga ARRSH.
AA981TJ: borëpastruese në tender, e çregjistruar në dokumente?
Një prej mjeteve të deklaruara është AA981TJ.
Kompania deklaron se e ka siguruar përmes një kontrate qiraje.
Por dokumentacioni i Drejtorisë së Shërbimit të Transportit Rrugor tregon se mjeti rezulton i çregjistruar që prej tetorit 2024.
Nëse ky informacion konfirmohet, pyetja është e pashmangshme:
Si është deklaruar si mjet i disponueshëm për një kontratë publike një automjet që rezulton i çregjistruar?
Dhe më e rëndësishmja:
A e ka verifikuar këtë fakt komisioni i tenderit?
Tre mjete të tjera me regjistrim të skaduar
Por rasti i AA981TJ nuk është i vetmi.
Në dokumentacionin e tenderit rezultojnë edhe mjete që Bami sh.p.k. deklaron se i ka siguruar në Kosovë përmes kontratave të qirasë.
Sipas dokumenteve të disponuara, tre prej tyre rezultojnë me regjistrim që ka përfunduar në maj të këtij viti.
Këtu lind një tjetër pyetje:
Në çfarë date dhe mbi çfarë dokumentesh ARRSH i ka konsideruar këto mjete si të vlefshme për plotësimin e kriterit teknik?
Dhe pastaj vjen “borëpastruesja” që del kamionçinë
Rasti tjetër është edhe më interesant.
Mjeti me targë AA543RU është deklaruar nga kompania si borëpastruese, me firmën e administratorit Gëzim Marku.
Por në dokumentacionin e Drejtorisë së Shërbimit të Transportit Rrugor, mjeti rezulton i regjistruar si Mercedes-Benz Sprinter, kamionçinë.
Pra, në dokumentet e tenderit paraqitet si borëpastruese, ndërsa në dokumentet e regjistrimit të mjetit rezulton kamionçinë.
Kush ka të drejtë?
Këtë nuk duhet ta vendosë as Bami, as media.
Duhet ta sqarojë ARRSH përmes dokumenteve teknike dhe verifikimit fizik të mjetit.
A i verifikoi ARRSH dokumentet?
Kjo është pyetja kryesore e gjithë historisë.
Sepse të dhënat mbi regjistrimin dhe kategorinë e mjeteve nuk janë dokumente të paarritshme për një institucion shtetëror.
Nëse një kompani deklaron 11 borëpastruese për të përmbushur një kriter të detyrueshëm, komisioni duhet të dijë nëse ato mjete janë realisht në dispozicion dhe nëse përmbushin specifikimet e tenderit.
Nëse nuk i përmbushin, atëherë duhet të shpjegohet se pse kompania u kualifikua.
47.5 milionë euro dhe vetëm një kompani?
Çështja nuk kufizohet vetëm te ky lot.
Bëhet fjalë për një paketë tenderësh me vlerë rreth 47.5 milionë euro për mirëmbajtjen e rrugëve.
Dhe kur në një procedurë me vlerë miliona euro mbetet vetëm një kompani e kualifikuar, çdo dokument teknik duhet të kontrollohet me lupë.
Sidomos kur bëhet fjalë për kritere që mund të përcaktojnë drejtpërdrejt kualifikimin ose skualifikimin e një operatori.
Një tender 12 milionë eurosh nuk është vendi ku dokumentet duhet të kalojnë me sy mbyllur.
Nëse borëpastrueset rezultojnë vërtet të çregjistruara, me regjistrim të skaduar apo të klasifikuara si mjete të tjera, atëherë institucionet duhet të japin shpjegime.
Dhe nëse dokumentet e paraqitura në tender rezultojnë të pasakta, atëherë çështja kalon nga një problem administrativ në një çështje që kërkon verifikim të plotë ligjor.
Topi tani është në fushën e ARRSH-së dhe institucioneve të drejtësisë.
Pyetja është e thjeshtë:
12 milionë euro për mirëmbajtjen e rrugëve — por sa nga 11 borëpastrueset e Bamit ekzistojnë realisht dhe sa prej tyre plotësojnë kriteret e tenderit?
