Autoritetet ukrainase kundër korrupsionit, NABU dhe SAPO, kanë nisur një aksion ndaj zyrtarëve të Prokurorisë së Përgjithshme, të dyshuar për përfshirje në një rrjet kriminal që lidhet me mashtrime përmes të ashtuquajturave “call center”. Hetimi, i koduar “Kartagjena”, bazohet, mes të tjerash, në regjistrime audio që sugjerojnë se zyrtarë të lartë të Prokurorisë kanë marrë ryshfete në këmbim të mbrojtjes së këtyre kompanive nga ndjekja penale. Një zyrtar i lartë, i përmendur në incizime me pseudonimin “Kancelari”, është arrestuar, sipas raportimit të DW.
Dyshimet kanë prekur edhe ish-Prokurorin e Përgjithshëm, Ruslan Kravçenko, i cili ka dhënë dorëheqjen dhe mohon çdo përfshirje në aktivitete të paligjshme. Regjistrimet përmbajnë referenca që, sipas hetuesve, mund të lidhen me të, ndërsa pretendohet se një zyrtar i përfshirë i ka kryer edhe shërbime private. Hetimet po vlerësojnë provat nga incizimet audio për të përcaktuar rolet dhe përfitimet e mundshme të zyrtarëve të përfshirë.
Sipas organizatës Iniciativa Globale kundër Krimit të Organizuar Transnacional, në Ukrainë operojnë rreth 1,000 “call center-a” të paligjshme, ku dyshohet se punojnë rreth 60,000 persona. Të ardhurat e një kompanie të tillë vlerësohen mesatarisht në rreth 1 milion dollarë në muaj. Hetimet tregojnë se zyrtarë të Prokurorisë mund të kenë marrë qindra mijëra dollarë në muaj ryshfete për të mbrojtur një pjesë të këtyre kompanive, sipas hetuesve dhe materialeve të grumbulluara në hetim.
Skandali po shfaqet në një periudhë të ndjeshme për Ukrainën, e cila po përballet me luftën me Rusinë dhe presion të vazhdueshëm për forcimin e luftës kundër korrupsionit. Hetimet e koduara “Kartagjena” vijojnë ndërsa autoritetet përpiqen të verifikojnë implikimet e zyrtarëve të prokurorisë dhe rrjetit kriminal të lidhur me call center-at. Top Channel.
