Zyra e Prokurorit të Specializuar (ZPS) ka kërkuar që ish-presidenti i Kosovës, Hashim Thaçi, të shpallet fajtor dhe të dënohet me gjashtë vjet burgim për pengim të drejtësisë në Dhomat e Specializuara në Hagë. Mbrojtja e Thaçit kundërshton dhe thotë se nuk ka prova që justifikojnë dënimin, duke kërkuar lirimin e tij. Prokurori Joshua Hafetz deklaroi se akuzat e ngritura janë krime dhe paraqiti incizime e dokumente që sipas tij konfirmojnë përpjekjet për ndikim ndaj dëshmitarëve. Prokurorja Kimberly West tha se Thaçi dhe të bashkakuzuarit tentuan për muaj të ndikonin në dëshmitë e dëshmitarëve për çështjen e krimeve të luftës, dhe se për këtë u kapën me orë incizimesh dhe dokumente.
Prokuroria risolli pjesë bisedash të incizuara mes Thaçit dhe bashkëakuzuarve, duke pretenduar se ai udhëzoi ndryshime të dëshmive, përgatitjen e narrativave që minimizojnë rolin e tij komandues dhe shënjestrimin e dëshmitarëve, përfshirë Sylejman Selimin, Bislim Zyrapin dhe një dëshmitar të mbrojtur të identifikuar si dëshmitari 6. Prokuroria pohoi se materiale konfidenciale dhe udhëzime për ndryshimin e dëshmive u gjetën në posedim të disa të pandehurve, si Kilaj dhe Smakaj, dhe se Hajredin Kuçi kontaktoi dëshmitarë pa autorizim të gjykatës.
Për të akuzuarit e tjerë, Prokuroria kërkoi dënime: Hajredin Kuçi me nëntë muaj burg, ndërsa Fadil Fazliu, Isni Kilaj dhe Bashkim Smakaj me nga tre vjet secili. Akuzat ndaj Thaçit përfshijnë tre akuza për tentim për pengim të personave zyrtarë dhe tetë akuza për shkelje të fshehtësisë së procedurës dhe mosbindje ndaj gjykatës. Smakaj, Kilaj, Fazliu përballen secili me nga një akuzë për tentim pengimi dhe një për mosbindje, ndërsa Kuçi me dy akuza për mosbindje. Të gjithë janë deklaruar të pafajshëm.
Deklaratat përmbyllëse zhvillohen sot, nesër dhe më 14 shtator; dy ditë pas tyre pritet aktgjykimi për rastin kryesor të krimeve të luftës, ku Prokuroria ka kërkuar 45 vjet burg për Thaçin, Kadri Veselin, Jakup Krasniqin dhe Rexhep Selimin. Gjykimi ndaj tyre për krime lufte përfundoi në shkurt; më shumë se 130 dëshmitarë dëshmuan dhe u paraqitën 160 deklarata të tjera. Thaçi është në paraburgim në Hagë që nga nëntori 2020; zyrtarët e gjykatës kanë vendosur rishikime të paraburgimit, me vendimin e fundit më 31 korrik dhe afate për parashtrimet deri më 21 shtator.
