Mbi 130 ekspertë ligjorë në Mbretërinë e Bashkuar, përfshirë 18 Këshilltarë të Mbretit, i kanë kërkuar qeverisë britanike të vendosë masa më të ashpra ndaj Izraelit, duke vlerësuar se sanksionet aktuale nuk i përmbushin detyrimet e Londrës sipas së drejtës ndërkombëtare. Në një letër drejtuar kryeministrit, nënshkrues mes të cilëve avokatët Michael Mansfield KC dhe Imran Khan KC dhe ish-gjyqtari i apelit Alan Moses, thonë se masat e fundit të Mbretërisë së Bashkuar janë të nevojshme, por “shumë më pak” se ç’parashikon vendimi i Gjykatës Ndërkombëtare të Drejtësisë (GJND) mbi pushtimin izraelit të territoreve palestineze.
Ekspertët i bëjnë thirrje qeverisë të zgjerojë sanksionet përtej ndalimit të importit nga vendbanimet izraelite dhe të marrë masa kundër aktiviteteve ekonomike dhe institucioneve që, sipas tyre, mund të kontribuojnë në vazhdimin e pushtimit. Një kërkesë kryesore është vendosja e një embargoje të plotë të armëve ndaj Izraelit, me referencë te neni 6(3) i Traktatit të Tregtisë së Armëve, i cili ndalon transferimin e armëve kur ka dijeni se ato mund të përdoren për kryerjen e krimeve të caktuara ndërkombëtare.
Përveç embargos së armëve, letra sugjeron zgjerimin e sanksioneve në sektorë të tjerë, përfshirë sigurimet, shërbimet e kontabilitetit dhe infrastrukturën dixhitale. Nënshkruesit kërkojnë gjithashtu që qeveria të konfirmojë publikisht se institucionet publike britanike, fondet e pensioneve dhe fondi sovran nuk kanë investime në vendbanimet izraelite.
Ekspertët mbështesin kërkesat e tyre në opinionin këshillimor të GJND-së të vitit 2024, i cili konkludoi se prania dhe politika e Izraelit në territoret palestineze të pushtuara janë të paligjshme dhe kërkoi përfundimin sa më të shpejtë të pushtimit. Gjykata theksoi gjithashtu detyrimin e shteteve të tjera për të mos njohur si të ligjshme situatën e krijuar dhe për të mos ofruar ndihmë që e ruan atë. Nënshkruesit argumentojnë se këto detyrime kërkojnë masa më të gjera sesa ndalimi i importeve nga vendbanimet, dhe krahasojnë masat britanike me sanksionet e vendosura ndaj Rusisë për pushtimin e Ukrainës. Ralph Wilde, profesor i së drejtës ndërkombëtare në University College London dhe një prej hartuesve të letrës, vlerësoi njohjen britanike të paligjshmërisë së pushtimit si një ndryshim të rëndësishëm, por tha se vëmendja nuk duhet të kufizohet vetëm te vendbanimet dhe kolonët.
