Komisioni Europian, sipas raportimit të Euronews, ka deklaruar se Shqipëria i ka dhënë garanci se projekti turistik i lidhur me biznesmenin Jared Kushner, me vlerë rreth 1.4 miliardë euro, do të përmbushë standardet mjedisore të Bashkimit Evropian. Komisionerja për Zgjerim e BE-së, Marta Kos, tha në një konferencë për shtyp se autoritetet shqiptare kanë siguruar Komisionin se do të kryhet një vlerësim i plotë i ndikimit në mjedis dhe se do të respektohen standardet evropiane. “Ne kemi marrë garanci nga qeveria e Shqipërisë se do të bëhet një vlerësim i plotë mjedisor dhe se standardet evropiane do të respektohen,” theksoi Kos.
Projekti luksoz, i vlerësuar mbi 1.4 miliardë euro, ka shkaktuar protesta në vend, pasi parashikohet të zhvillohet në një zonë të mbrojtur ekologjikisht në bregdetin e Adriatikut. Autoritetet shqiptare janë kërkuar më herët nga përfaqësues të Komisionit Evropian që të veprojnë pa vonesë, për të shmangur çdo rrezik ndaj procesit të integrimit të vendit në BE. Shqipëria vazhdon të jetë një nga vendet më të avancuara në procesin e anëtarësimit, por për të përmbyllur negociatat duhet të harmonizojë plotësisht legjislacionin me atë të Unionit, përfshirë edhe në fushën e mbrojtjes së mjedisit.
Kos theksoi gjithashtu se e drejta e protestës është një liri themelore në BE dhe në vendet kandidate, duke nënvizuar se procesi i anëtarësimit mbetet i bazuar në monitorim të vazhdueshëm dhe respektim të rregullave evropiane. Përfaqësuesit e Brukselit kanë shprehur nevojën që autoritetet shqiptare të sigurojnë transparencë dhe respekt të procedurave mjedisore për të shmangur impakte negative që mund të ndikojnë në vlerësimin e progresit të vendit drejt integrimit. Raporti dhe deklarimet zyrtare të Komisionit lidhin garancitë e dhëna nga Shqipëria me nevojën për vlerësim të plotë mjedisor dhe harmonizim ligjor, ndërsa tensionet lokale rreth projektit vijojnë për shkak të natyrës së zonës ku planifikohet ndërtimi. Top Channel.
