Një dhëmb i prishur mund të ketë pasoja për shëndetin e përgjithshëm, por shumë pacientë e neglizhojnë trajtimin për shkak të kostove të larta në klinikat stomatologjike private dhe presin deri kur dhimbja bëhet e padurueshme. Si alternativë, QSUT ofron shërbime falas në Klinikën Stomatologjike Universitare, që disponon kushte dhe pajisje moderne të fjalës së fundit, të cilat nuk gjenden në të gjitha klinikat private.
Një pacient shprehu kënaqësinë e tij duke thënë: “Kam për të hequr 5 dhëmbë. Më thanë është shumë mirë dhe qenka vërtet shumë mirë”. Drejtoresha e Klinikës Stomatologjike Universitare, Belisa Kaleci, sqaron se shërbimet falas përfshijnë të rinjtë deri në 18 vjeç dhe grupet në nevojë: “Përfitojnë falas deri në 18 vjeç, grupet në nevojë”.
Klinika ofron një gamë shërbimesh që varion nga ndërhyrjet më të thjeshta deri te procedurat më komplekse. Sipas Kalecit, në klinikë kryhen “Që nga më të thjeshtat deri në ngritje sinusesh, kirurgji, grafi, skaner 3D i fjalës së fundit.” Ajo thekson se përdorimi i skanerit 3D ka një tarifë, por kjo tarifë është disa fish më e ulët se në klinikat private.
Për të përfituar shërbimin në Klinikën Stomatologjike Universitare, procedura është e thjeshtë: “Mjafton vetëm karta e identitetit, mjeku përcakton diagnozën dhe të drejton se në cilin kabinet duhet të marrësh shërbim,” shpjegon Kaleci. Kjo lehtësi administrative synon të bëjë më të aksesueshme trajtimin për pacientët që kanë nevojë, pa barriera proceduriale të komplikuara.
Klinika kryen mesatarisht 50 trajtime çdo ditë, duke arritur afërsisht 12 mijë trajtime në vit. Këto shifra pasqyrojnë volumet e punës dhe shtrirjen e shërbimeve që ofrohen për pacientët, veçanërisht për grupet që përfitojnë shërbime falas ose me tarifa më të ulëta krahasuar me sektorin privat.
