Presidenti i Serbisë, Aleksandar Vuçiç, njoftoi se do të rritet numri i raketave kineze CM-400 në artilerinë serbe dhe se do të blihen avionë të rinj ushtarakë. Deklaratat i bëri gjatë një stërvitjeje dhe prezantimi të armatimit të Ushtrisë së Serbisë, të organizuar më 28 qershor në aeroportin ushtarak në Batajnicë pranë Beogradit dhe në poligonin Pasulanske Livade me rastin e festës së Vidovdanit. Gjatë ngjarjes u demonstruan kapacitete të njësive artilerike dhe raketore për mbrojtje kundërajrore, operacione aviacioni, njësi tankesh, këmbësorie, njësi të mekanizuara, artileri dhe dronë.
Vuçiç vizitoi ekspozitën e pajisjeve në aeroportin “Nënkolonel-pilot Millenko Pavlloviq” ku ishin ekspozuar edhe raketat CM-400, të blera nga Kina në mars. “CM-400 janë raketa të frikshme. Do ta rrisim numrin e tyre”, tha ai. Megjithë paralajmërimet nga Brukseli dhe Uashingtoni, Serbia ka thelluar bashkëpunimin ushtarak me Kinën. Sipas SIPRI, gjatë periudhës 2020–2024 Serbia importoi më shumë armë nga Kina (57 për qind), ndjekur nga Rusia (20 për qind) dhe Franca (7.4 për qind). Në prezantim është përmendur gjithashtu sistemi kinez FK-3, i shfaqur më parë gjatë demonstrimeve të forcave serbe.
Vuçiç tha se pilotët e Ushtrisë së Serbisë kanë nisur trajnimin për përdorimin e avionëve luftarakë francezë Rafale, të blerë në vitin 2024, dhe se pas dorëzimit të tyre do të vijnë edhe avionë të tjerë luftarakë dhe avionë për trajnim. “Do të kemi gjithçka, prandaj do të na duhen edhe shumë pilotë të tjerë”, deklaroi ai pas stërvitjes.
Ai theksoi se Serbia do të vazhdojë politikën e neutralitetit ushtarak dhe synon të zhvillojë stërvitje me të gjithë partnerët. Vuçiç shpjegoi se aktualisht ka më shumë stërvitje me vendet perëndimore për shkak të luftës mes Rusisë dhe Ukrainës, dhe se pjesëmarrja në stërvitje me njërën palë mund të interpretohet si pozicionim në konflikt. Serbia është pjesë e programit të NATO-s Partneriteti për Paqe që nga 2006, por ka mbajtur moratorium për stërvitjet me partnerë të huaj pas nisjes së pushtimit të Ukrainës në 2022, me disa përjashtime si stërvitjet “Ujku i Platintë” në 2023 dhe 2025. Forcat serbe zhvilluan gjithashtu stërvitje të përbashkëta me ushtrinë kineze, përfshirë një trajnim dhjetëditor në provincën Hebei në korrik 2025.
