Një sulm rus të shtunën goditi Urën Pivnichnyi (Veriore) në Kiev, plagosi dy persona dhe shkaktoi dëme në sipërfaqen e rrugës dhe në linjat e trolejbusëve, si dhe ndërpreu përkohësisht qarkullimin mbi urë. Kryebashkiaku i Kievit, Vitaliy Klitschko, njoftoi se shërbimet e emergjencës mbërritën në vendngjarje, ndërsa trafiku nga bregu i majtë drejt atij të djathtë u bllokua.
Sulmi vjen pak ditë pas goditjeve me dron ndaj Ura Pivdennyi (Jugore), dhe të dyja urat, që lidhin pjesët lindore dhe perëndimore të qytetit përmes lumit Dniepër, konsiderohen të rëndësishme për lëvizjen e banorëve dhe transportin në kryeqytet. Sulmet e përsëritura kanë shkaktuar ndërprerje në qarkullimin rrugor, hekurudhor dhe të trolejbusëve, duke sjellë trafik të rënduar në zona të ndryshme të qytetit.
Autoritetet paralajmërojnë se dëmtimet e vazhdueshme mund të dobësojnë strukturën e urave dhe potencialisht të çojnë në mbylljen e tyre. Ekspertët vlerësojnë se dronët nuk kanë gjasa të rrëzojnë plotësisht urat, por sulmet e përsëritura mund t’i bëjnë ato të papërdorshme. Në pritje të situatave të tilla, autoritetet ukrainase kanë diskutuar mundësinë e përdorimit të trageteve ose urave të përkohshme pontone në rast se lidhjet kryesore mbi Dniepër ndërpriten.
Klitschko e përshkroi situatën në Kiev si “shumë dramatike”, duke akuzuar Moskën se po synon infrastrukturën kritike, logjistikën dhe objektet e tjera të rëndësishme të qytetit. Nga ana tjetër, Rusia deklaroi se dronët e saj kishin goditur dy ura që, sipas Moskës, përdoren për transferimin e trupave dhe ngarkesave ushtarake ukrainase, dhe u bëri thirrje qytetarëve të huaj, përfshirë diplomatët, që të largohen nga Kievi.
Presidenti ukrainas Volodymyr Zelensky akuzoi Rusinë se po synon infrastrukturën jetike të Ukrainës. Presidenti rus Vladimir Putin e ka justifikuar fushatën e sulmeve si përgjigje ndaj goditjeve ukrainase ndaj objekteve energjetike dhe infrastrukturës së naftës në Rusi. (Top Channel)
