Me miratimin e ligjit për ngritjen e qendrave për dëbimin e azilkërkuesve të refuzuar në vende të treta, vendet anëtare të Bashkimit Evropian krijuan bazën ligjore për krijimin e këtyre objektivave. Ministrat e Brendshëm të BE-së miratuan ligjin gjatë një takimi në Luksemburg. Në qendrat e planifikuara për dëbimin, të njohura edhe si “Return Hubs”, do të dërgohen personat që kanë marrë urdhër për largim nga BE-ja, por që nuk mund të kthehen në vendet e tyre të origjinës, për shembull për shkak se shteti i tyre refuzon t’i pranojë.
Gjermania ka qenë ndër përkrahësit kryesorë të kësaj nisme, së bashku me Austrinë, Danimarkën, Greqinë dhe Holandën. Sipas ministrit Dobrindt, aktualisht zhvillohen bisedime paraprake me disa shtete; ai nuk dha detaje se cilat vende po negociohen, por në diskutimet publike janë përmendur vazhdimisht si vende të mundshme Ruanda, Uganda, Libia dhe Kazakistani.
Qendrat për dëbimin diskutohen prej vitesh dhe mbeten shumë të debatueshme. Organizata për mbrojtjen e të drejtave të njeriut Amnesty International shpreh shqetësimin se në këto qendra mund të ndodhin shkelje të të drejtave të njeriut dhe paralajmëron kundër marrëveshjeve me vende të prekura nga konflikte ose me paqëndrueshmëri politike.
Rregullat e reja të migracionit përcaktojnë gjithashtu detyrimet e azilkërkuesve të refuzuar për të bashkëpunuar në procesin e riardhesimit nëse duan të shmangin ndalimin në paraburgim. Në të kundërt, ata mund të përballen në gjithë BE-në me uljen ose heqjen e përfitimeve sociale, si edhe me konfiskimin e dokumenteve të udhëtimit. Autoritetet e shteteve anëtare mund të urdhërojnë mbajtjen në burg deri në momentin e dëbimit nëse konstatohet se personi mund të arratiset ose nëse konsiderohet rrezik për sigurinë kombëtare.
Me rregullat e reja zgjatet edhe kohëzgjatja maksimale e burgimit, e cila mund të arrijë deri në 24 muaj, me mundësi zgjatjeje edhe për gjashtë muaj të tjerë në raste të veçanta. Rregullat e reja pritet të hyjnë në fuqi në javët e ardhshme.
