Sulmet ruse me dronë ndaj Ukrainës kanë vijuar gjatë orëve të fundit në disa zona, ndërsa autoritetet ukrainase raportojnë për një valë të re sulmesh ajrore. Sipas të dhënave të tyre, Rusia lëshoi 133 dronë, nga të cilët mbrojtja ajrore arriti të interceptojë 111.
Në Kiev u përhap një video në rrjetet sociale që tregon një dron rus Geran-2 të përfshirë nga flakët pasi u godit nga mbrojtja ajrore, që bie në mes të një rruge ndërsa automjete vijonin qarkullimin. Pamjet dokumentojnë përmasat e sulmeve dhe rrezikun e përditshëm për qytetarët.
Një tjetër sulm tragjik u regjistrua në rajonin e Odessa-s, ku një dron rus Shahed goditi motorin e një treni pasagjerësh. Si pasojë e goditjes humbën jetën makinisti dhe ndihmësi i tij. Treni transportonte 340 pasagjerë dhe po i afrohej një stacioni ku ishte planifikuar që udhëtarët të zbrisnin, pasi ishte konstatuar një kërcënim nga një dron.
Autoritetet thanë se ekuipazhi i lokomotivës po përpiqej të ndalonte trenin dhe të krijonte mundësinë që pasagjerët të zbrisnin në mënyrë të sigurt. Megjithatë, droni ndryshoi papritur trajektore dhe goditi motorin, duke mos i lënë kohë makinistëve të reagonin.
Pas goditjes, pasagjerët u evakuuan në mënyrë të sigurt dhe nuk raportohet për të plagosur mes tyre. Ata u transportuan më pas drejt Odessa-s me autobusë.
Ngjarjet vijnë ndërsa Rusia ka intensifikuar sulmet me dronë në disa zona të Ukrainës. Autoritetet ukrainase theksojnë se këto sulme vënë në rrezik jo vetëm objektivat ushtarake dhe infrastrukturën, por edhe transportin civil dhe jetën e qytetarëve. Sipas raportimit, ndërhyrjet e mbrojtjes ajrore kanë neutralizuar pjesën më të madhe të pajisjeve të lëshuara, por incidente të tilla si goditja e trenit tregojnë se kërcënimi mbetet prezent dhe mund të prodhojë pasoja fatale për personelin civil dhe për transportin publik.
