Një tufë bagëtish u godit nga rrufeja mesditën e së premtes në fshatin Derdush, njësia administrative Dardhas, në Bashkinë e Pogradecit. Si pasojë, rreth 10 krerë bagëti të imta kanë ngordhur, ndërsa 17 të tjera kanë mbetur të plagosura.
Sipas të dhënave paraprake, tufa përbëhej nga rreth 190 dele dhe dhi, pronë e shtetases Tatjana Biçoku. Bagëtitë qenë në shtegtim, duke lëvizur nga zona e Pirgut drejt kullotave malore, kur u goditën nga rrufeja.
Menjëherë pas ngjarjes, në vendngjarje u nisën shërbimet veterinare për të vlerësuar gjendjen e bagëtive që mbijetuan dhe për të marrë masat e nevojshme për trajtimin e tyre. Autoritetet po kryejnë verifikime në terren për të përcaktuar bilancin përfundimtar të dëmeve.
Komunikimi me barinjtë dhe pronaren e tufës ka qenë i vështirë për shkak të mungesës së sinjalit telefonik në zonën malore, çka ka penguar marrjen e informacionit të plotë në kohë reale. Për këtë arsye, autoritetet pritet të dalin me një raport përfundimtar pas përfundimit të verifikimeve në terren.
